BAKI, AzerVoice

Hakan Fidan Rusiyaya səfər edir - Gündəmdə Rusiya-Ukrayna müharibəsi, ticarət və regional əməkdaşlıq var.

AzerVoice xəbər verir ki, Türkiyənin xarici işlər naziri Hakan Fidan rusiyalı həmkarı Sergey Lavrovun dəvəti ilə mayın 26-27-də Rusiyaya səfər edəcək.

Diplomatik mənbələrə əsasən, Fidan səfər çərçivəsində Rusiya prezidenti Vladimir Putin tərəfindən qəbul olunacaq və Sergey Lavrovla geniştərkibli görüşlər keçirəcək. İstanbulda keçiriləcək Rusiya-Ukrayna danışıqları çərçivəsində o, Rusiya nümayəndə heyətinin rəhbəri, vitse-prezident Vladimir Medinski və müdafiə naziri Andrey Belousovla da bir araya gələcək.

Görüşlərdə Türkiyə və Rusiya arasındakı ikitərəfli münasibətlər – xüsusilə ticarət, enerji və turizm sahələrində əməkdaşlıq imkanları – ətraflı şəkildə müzakirə olunacaq. Fidanın Rusiya-Ukrayna münaqişəsində ədalətli və davamlı sülhün təmininə yönəlmiş təşəbbüsləri dəstəkləyəcəyini və Türkiyənin vasitəçilik rolunu davam etdirməyə hazır olduğunu vurğulaması gözlənilir.

Nazir Fidanın gündəmində Suriya, Qəzza və Cənubi Qafqaz kimi regional məsələlər də yer alacaq. Onun bu mövzularda qarşılıqlı fikir mübadiləsi aparmaq və dialoqu təşviq etmək niyyətində olduğu bildirilib.

Qeyd edək ki, Hakan Fidan bu il ərzində Rusiyaya bir neçə dəfə səfər edib. O, 10-11 iyun tarixlərində BRİKS+ toplantısında iştirak edib, 24 oktyabrda prezident Ərdoğanla birlikdə BRİKS Zirvəsinə qatılıb. Sonuncu dəfə isə aprelin 12-də Antalya Diplomatiya Forumu çərçivəsində Lavrovla görüşüb. Lavrov da 2024-cü ildə bir neçə dəfə Türkiyəyə səfər edərək Fidana ilə müxtəlif formatlarda ikitərəfli görüşlər keçirib.