BAKI, AzerVoice
Türkiyədə DEM Partiyasının sözçüsü Ayşegül Doğan gündəmə dair verdiyi açıqlamada PKK-nın yaxın vaxtlarda qurultay keçirəcəyinin gözlənildiyini bildirib.
AzerVoice xəbər verir ki, Doğan bu addımı “tarixi” olaraq dəyərləndirib və partiya olaraq öz üzərlərinə düşən siyasi məsuliyyəti yerinə yetirməyə hazır olduqlarını bəyan edib.
“PKK-nın qurultay keçirdiyini elan etməsi an məsələsidir. Bu, tarixi bir mərhələ olacaq. Əsas məsələ bundan sonrakı siyasi addımlardır və biz siyasətçilərə ciddi vəzifələr düşür” – deyə Doğan qeyd edib.
Partiya sözçüsü çıxışında DEM Partiyasının üzvlərindən Sırrı Süreyya Öndərə qarşı sui-qəsd cəhdi ilə bağlı da danışıb. Onun sözlərinə görə, Öndərin avtomobilinə quraşdırılmış və təkəri partlatmaq məqsədi güdən bir qurğu aşkarlanaraq hüquq-mühafizə orqanlarına təhvil verilib.
“Hadisə ilə bağlı bütün hüquqi prosedurlar başladılıb, təhlükəsizlik tədbirləri isə gücləndirilib” – deyə o bildirib.
DEM Partiyasının Van millət vəkili Pervin Buldanın İtaliyanın paytaxtı Romada avtomobil qəzası keçirdiyi də partiya tərəfindən təsdiqlənib. Ayşegül Doğanın sözlərinə görə, hadisə qəsd xarakteri daşımır.
“Avtomobili idarə edən sürücünün səhvən əks istiqamətə girməsi qəzanın səbəbi olub. Pervin Buldan və avtomobildə olan digər şəxs Keskin Bayındırın səhhətində hər hansı problem yoxdur” – deyə o qeyd edib.
