BAKI, AzerVoice

Türkiyə Prezidenti Rəcəb Tayyib Ərdoğan 9 May Avropa Günü münasibətilə verdiyi mesajda Avropa xalqlarını, xüsusilə də öz vətəndaşlarını təbrik edib. O, Avropa Günü münasibətilə yayımladığı açıqlamada 1950-ci il Şuman Bəyannaməsi ilə başlayan Avropanın siyasi və iqtisadi inteqrasiya prosesinin bu günün simvolu olduğunu vurğulayıb.

AzerVoice xəbər verir ki, Prezident Ərdoğan bildirib ki, Avropa inteqrasiyasının təcəssümü olan Avropa Birliyi, son illərdə çoxşaxəli qlobal və regional çağırışlarla üz-üzə qalıb: “Avropa təhlükəsizlik memarlığının gələcəyi müzakirə olunur. Qəzzada 19 aydır davam edən qətliamlar qarşısında səssiz qalınması, İsrailin hücumlarını dayandıracaq effektiv siyasət formalaşdırıla bilməməsi Birlik dəyərlərinin sorğulanmasına səbəb olur.”

Ərdoğan qeyd edib ki, Avropa Birliyinin bu gün də quruluş illərindəki kimi uzaqgörən və cəsur baxış bucağına ehtiyacı var: “Bu çətin dönəmdə fərdi üzvlərin maraqlarına tabe olmayan, qitənin ümumi maraqlarına fokuslanan, əhatəli və bütünləşdirici bir Avropa Birliyi hər kəsin mənafeyinə uyğundur.”

Türkiyənin Avropa Birliyinə namizəd bir ölkə olaraq böhran və münaqişələrdə göstərdiyi insani, sülhsevər və konstruktiv siyasətlə, ortaya qoyduğu ədalətli həll yolları ilə Birliyin sabitliyi üçün zəmanət rolu oynadığını deyən Ərdoğan, mesajını bu sözlərlə tamamlayıb:

“Son dövrlərdə transatlantik və qlobal proseslərin ənənəvi siyasətləri yenidən gözdən keçirməyə məcbur etdiyi bir vaxtda, Türkiyə-Avropa Birliyi münasibətlərinin əhəmiyyəti bir daha ortaya çıxmışdır. Bəzi qurum və şəxslərin ölkəmizə qarşı qeyri-obyektiv mövqelərinə baxmayaraq, Birliyin qarşıdakı dövrdə qarşılıqlı fayda əsasında, uzunmüddətli və strateji baxışla hərəkət edəcəyinə inanıram. Bu münasibətlə, öz vətəndaşlarım başda olmaqla, bütün Avropa xalqlarının Avropa Gününü təbrik edirəm.”