BAKI, AzerVoice
İran Xarici İşlər Naziri Abbas Arakçi, ABŞ-ın “Fox News” kanalının İranın Səmnan vilayətində “gizli nüvə obyektinin” aşkarlanması barədə irəli sürdüyü iddiaları təkzib edib.
AzerVoice xəbər verir ki, Arakçi bu iddiaların İsrail tərəfindən İran əleyhinə fəaliyyət göstərən “Xalqın Mücahidləri” təşkilatı vasitəsilə gündəmə gətirildiyini bildirib. Nazir sosial media hesabında etdiyi paylaşımda, İran ilə ABŞ arasında aparılan dolayı nüvə danışıqlarının yenidən başlaması fonunda ictimai rəyə təsir göstərmək məqsədilə “qorxuducu peyk görüntülərinin” yayılmağa başladığını qeyd edib.
İsrailin ABŞ-İran danışıqlarındakı mənfi roluna diqqət çəkən Arakçi, “Etibarını itirən və sabotajçı olduğu üzə çıxan Netanyahu, Trampa nə edə biləcəyini diktə etməyə çalışan siyasəti ilə indi həm köhnə, həm də yeni kuklalara müraciət edir,” – deyə bildirib.
İranın xarici işlər naziri, İsrailin İran əleyhinə fəaliyyətlərdə Səddam Hüseyn dövründən qalma qruplardan istifadə etməyə çalışdığını da qeyd edib: “Bu şəxslər və təşkilatların maliyyə yükü az ola bilər, lakin bu qrupları dövriyyəyə buraxmaq yalnız dərin acizlik göstəricisidir.”
Xatırladaq ki, ABŞ-ın “Fox News” kanalı bir neçə gün öncə İranın Səmnan vilayətində “Rainbow Site” (Gökkuşağı Sahəsi) kod adı ilə gizli bir nüvə obyektinin inşa edildiyini iddia etmişdi. Kanalın yayımladığı peyk görüntülərinə əsasən, obyektin 2 500 dönümlük ərazini əhatə etdiyi və “Diba Energy Siba” adlı kimyəvi maddə istehsalçısı adı altında gizlədildiyi bildirilmişdi.
