BAKI, AzerVoice

Türkiyənin Ticarət naziri Ömər Bolat, hökumətin qətiyyətlə həyata keçirdiyi iqtisadi proqramın ixracat, istehsal, investisiya, məşğulluq və davamlı cari əməliyyatlar balansı sahəsində müsbət nəticələr verməyə davam etdiyini bildirib.

AzerVoice xəbər verir ki, nazir Bolat Türkiyə Statistika Təşkilatı (TÜİK) tərəfindən açıqlanan mart ayı üzrə sənaye istehsalı göstəricilərini sosial media hesabında dəyərləndirib.

Nazir sənaye istehsalı indeksinin mart ayında aylıq 3,4 faiz, illik isə 2,5 faiz artdığını bildirib. O, son aylarda indeksdə müşahidə olunan bərpa prosesinə diqqət çəkib və ixracatdakı artımın həm istehsala, həm də məşğulluğa müsbət təsir göstərdiyini vurğulayıb.

Bolat həmçinin mart ayında işsizlik səviyyəsinin 7,9 faizədək azaldığını xatırladaraq, bunun 2005-ci ildən bəri qeydə alınan statistik göstəricilərdə ən aşağı aylıq işsizlik səviyyəsi olduğunu bildirib.

“İxracat, istehsal, investisiya, məşğulluq və davamlı cari əməliyyatlar balansı istiqamətində həyata keçirdiyimiz iqtisadi proqramın müsbət təsirləri davam edir. Yay aylarında iqtisadi aktivliyin canlanması ilə bu göstəricilərdə daha da müsbət dinamika gözləyirik,” – deyə Bolat qeyd edib.