BAKI, AzerVoice
Türkiyə Prezidenti Rəcəb Tayyib Ərdoğan, Müstəqil Sənayeçi və İş Adamları Dərnəyi (MÜSİAD) ilə bağlı açıqlamasında təşkilatın hər zaman demokratiya, ədalət və azadlıqların tərəfində olduğunu vurğulayıb.
AzerVoice xəbər verir ki, Rəcəb Tayyip Ərdoğan bu fikirləri İstanbulda yerləşən Haliç Konqres Mərkəzində keçirilən MÜSİAD-ın 28-ci ümumi qurultayında səsləndirib. Qurultaya qatılarkən çıxış edən dövlət başçısı, MÜSİAD-ın uzun illərdir Türkiyənin iqtisadi və ictimai həyatında mühüm rol oynadığını qeyd edib.
Ərdoğan çıxışında 1999-cu ildə həbs edilməzdən əvvəl MÜSİAD-ın onu ilk fəxri üzv kimi qəbul etməsini heç vaxt unutmadığını bildirib: “28 Fevralın ağır atmosferinin davam etdiyi o günlərdə MÜSİAD-ın nümayiş etdirdiyi həmrəylik mənim qəlbimdə hər zaman xüsusi yer tutub. Yalnız 28 Fevral dövründə deyil, əvvəl və sonrakı illərdə də MÜSİAD hüquq, ədalət və azadlıqlardan yana güclü mövqe nümayiş etdirdi.”
Ərdoğan bildirib ki, keçmişdə iş adamları arasında ayrı-seçkiliyin yaşandığı dövrlərdə belə MÜSİAD istehsal və ixracatdan heç vaxt vaz keçməyib: “1990-cı ildən bu günə qədər Türk iqtisadiyyatının inkişafına, ixracatın və məşğulluğun artmasına mühüm töhfələr verdiniz. 35 ildir prinsipial mövqeyinizi qoruyub saxladınız. Qazanarkən xalqın da qazanmasına önəm verdiniz, ticarətdə bərəkət anlayışını yaşatdınız.”
Ərdoğan, MÜSİAD-ın Türk demokratiyasının, diplomatiyasının və müdafiə sektorunun son 23 ildəki uğurlarında əhəmiyyətli rol oynadığını qeyd edərək, təşkilata təşəkkür edib: “2002-ci ildən əvvəlki dövrlə müqayisədə bu gün daha güclü və nüfuzlu Türkiyə varsa, bunda MÜSİAD-ın 35 illik mübarizəsinin böyük payı var. Xalqın iradəsini hədəf alan hücumların qarşısının alınmasında da MÜSİAD-ın dəstəyi danılmazdır.”
Ərdoğan çıxışının sonunda MÜSİAD və onun üzvlərinə göstərdikləri prinsipial mövqeyə və Türkiyə iqtisadiyyatına verdikləri töhfəyə görə təşəkkür edib və təşkilatın fəaliyyətlərini yüksək qiymətləndirib.
