BAKI, AzerVoice
Yunanıstanın nüfuzlu nəşrlərindən olan Ta Nea qəzetində dərc olunan məqalədə, Yunan hökumətinin Türkiyəyə qarşı uzunmüddətli strategiyasının uğursuz olduğu etiraf edilib. Qəzetdə yer alan analizdə bildirilir ki, Afina, Türkiyənin regional gücə çevrilməsinin qarşısını almaqda aciz qalıb.
AzerVoice xəbər verir ki, Yunanıstan Xarici İşlər Nazirliyinin keçmiş məsləhət şurasının üzvü, professor Panayotis İoakeimidis tərəfindən yazılan məqalədə 1973-cü ildən bu günə qədər Türk-Yunan münasibətləri təhlil edilib. Məqalə “Yunanıstanın uzunmüddətli strategiyası uğursuz oldu” başlığı ilə təqdim olunub.
İoakeimidis məqaləsində bildirib: “Strategiyamızın əsas məqsədi Türkiyənin regional super güc olmasının qarşısını almaq idi. Lakin bu sahədə uğursuzluğa düçar olduq. Türkiyə bu gün artıq dünyanın əksər ölkələri tərəfindən güclü regional aktor kimi qəbul olunur.”
Yarım əsrlik münasibətlərin analizində müəllif 1973-cü ildə iki ölkə arasında əsas problemin “şelf bölgüsü” olduğunu xatırladıb. Hazırda isə 12 mövzuda ciddi fikir ayrılıqlarının mövcud olduğunu vurğulayıb.
Professor həmçinin Yunanıstanda silahlanmanın artmasının mövcud problemlərə həll gətirməyəcəyini bildirib və Atinanın reallığa əsaslanan yeni bir strategiya hazırlamasının vacibliyini qeyd edib: “Yunanıstanla Türkiyə arasında yaxın əməkdaşlıq və tərəfdaşlıq varoluşsal zərurətdir.”
Digər tərəfdən, Yunanistanın SLPRESS xəbər saytı isə Türkiyənin Baykar şirkətinin İtaliyanın aviasiya nəhəngi Piaggio Aerospace ilə əməkdaşlığına diqqət çəkib. Sayt bu əməkdaşlığın Ankara üçün Avropa müdafiə sənayesinə “faktiki giriş” təmin etdiyini və Baykarın qlobal bazarda artan nüfuzunun Türkiyənin strateji təsir gücünü artırdığını bildirib.
