BAKI, AzerVoice
Türkiyədə fırıldaqçılıq şəbəkəsinə zərbə - 1,25 milyard TL-lik əmlak və avtomobillər müsadirə edilib.
AzerVoice xəbər verir ki, Türkiyənin
Daxili İşlər Naziri Ali Yerlikaya fırıldaqçılıqla məşğul olan
mütəşəkkil cinayət qrupuna qarşı üç vilayətdə aparılan
əməliyyatların nəticələrini açıqlayıb.
O bildirib ki, əməliyyatlar nəticəsində 9 nəfər saxlanılıb,
onlardan 7-si həbs olunub, 2 nəfər barəsində isə məhkəmə nəzarəti
tətbiq edilib.
Nazir qeyd edib ki, Çanaqqala, Balıkəsir və Tekirdağ vilayətlərində aparılan əməliyyatlar çərçivəsində şübhəlilərin yüksək faizlə borc verərək vətəndaşlara təzyiq göstərdiyi, onlardan çek, veksel və əmlak sənədləri kimi girovlar aldığı, borcunu ödəyə bilməyən şəxslərin əmlaklarını isə zorla ələ keçirdiyi müəyyən olunub.
Maliyyə Cinayətlərini İstintaq İdarəsinin (MASAK) məlumatlarına əsasən, cinayət yolu ilə əldə edilən və ümumi dəyəri 1 milyard 250 milyon TL olan 75 daşınmaz əmlak və 34 nəqliyyat vasitəsi müsadirə edilib. Əməliyyatlar zamanı həmçinin çoxsaylı çek kitabçaları, kompüterlər, mobil telefonlar, müxtəlif sənədlər və rəqəmsal materiallar da ələ keçirilib.
Qeyd edək ki, əməliyyatlar Çanaqqala Baş Prokurorluğunun koordinasiyası ilə həyata keçirilib.
