BAKI, AzerVoice

Türkiyənin Eskişehir, Bursa, Balıkesir və Şırnakda həyata keçirilən genişmiqyaslı əməliyyat nəticəsində FETÖ-nün yenidən təşkilatlanması və terrorizmin maliyyələşdirilməsi ilə əlaqədar 23 nəfər saxlanılıb.

AzerVoice xəbər verir ki, Eskişehir Baş Prokurorluğunun rəhbərliyi ilə aparılan istintaq çərçivəsində Şəhər Polis İdarəsinin Qaçaqmalçılıq və Mütəşəkkil Cinayətkarlıqla Mübarizə Şöbəsi tərəfindən “Referansa Əsaslanan Böyümə” (RTB) modeli ilə fəaliyyət göstərən dönər restoranları şəbəkəsinin FETÖ ilə bağlılığı sübut olunub.

İstintaq materiallarına görə, FETÖ-yə yaxın şəxslərə qeyri-rəsmi ortaqlıq hüquqları verilərək bu şəxslər vasitəsilə pul toplanıb və xaricə əmanət üsulu ilə maliyyə axını təşkil edilib. Pul köçürmələri isə məhsul alışı adı altında sənədləşdirilərək iz itirilib.

Araşdırmalar zamanı məlum olub ki, FETÖ üzvləri restoranların filiallarında gizli təşkilati görüşlər keçirib, və təşkilat daxilində sadiqliyi artırmaq məqsədilə “gəlirin paylaşılması” təlimatı verilib. Ortaqlıqdan imtina edən şəxslərə isə bu prosesin "mənəvi əhəmiyyət" daşıdığı izah olunub.

Maliyyə Cinayətlərini Araşdırma İdarəsinin (MASAK) hesabatına əsasən, bu strukturlar ölkə daxilində və xaricində heç bir istintaqa məruz qalmayan şəxslər üzərindən maliyyələşdirilib. Eyni zamanda, xaricdə yeni franşizalar yaradılaraq transsərhəd pul axını təmin edilib.

Saxlanılan 23 nəfərdən 9-u ilkin ifadədən sonra sərbəst buraxılıb, 14 nəfər barəsində isə istintaq Eskişehir Baş Prokurorluğunda davam etdirilir. Təhlükəsizlik orqanları bu əməliyyatı FETÖ-nün gizli maliyyə və təşkilatlanma mexanizminin ifşası baxımından əhəmiyyətli addım kimi qiymətləndirib.