BAKI, AzerVoice, Nailə Babazadə

İsrail Müdafiə naziri İsrael Katsın ofisindən yayılan açıqlamaya görə, Kats çərşənbə günü ordunun Qəzza zolağında “HƏMAS”ı məğlub etməyə yönəlmiş hərtərəfli plan hazırlamasını tapşırıb.

AzerVoice xəbər verir ki, müdafiə nazirinin bu qərarı ABŞ prezidenti Donald Trampın bu gün verdiyi bəyanatla eyni vaxta təsadüf edib. Tramp bildirib ki, əgər “HƏMAS” atəşkəs razılaşmasına əməl etməsə, İsrail baş naziri Benyamin Netanyahunun Qəzzada hərbi əməliyyatları bərpa etməsinə icazə verməyi nəzərdən keçirəcək.

“İsrail küçələrə geri dönəcək - mən bir söz desəm, bu baş verəcək.“HƏMAS-la baş verənlər çox tez bir zamanda düzəldiləcək.”-deyə Tramp bildirib.

Trampın bu açıqlamaları İsrailin “HƏMAS”ı - ABŞ hökumətinin terror təşkilatı kimi tanıdığı hərəkatı - razılaşmaya əməl etməməkdə ittiham etdiyi bir vaxtda səslənib.

Trampın 20 maddədən ibarət sülh planının 4-cü bəndinə əsasən, “İsrail bu razılaşmanı ictimai şəkildə qəbul etdikdən sonra 72 saat ərzində bütün girovlar - sağ və ya həlak olan - geri qaytarılmalıdır.”
Bu günə qədər “HƏMAS” 20 sağ israilli girovu İsrailə təhvil verib, həmçinin dörd nəfərin cəsədini qaytarıb. Lakin İsrail ordusunun bildirdiyinə görə, həmin cəsədlərdən biri israilli girova aid deyil.
Bu axşam “İzzəddin əl-Qəssam” briqadaları iki girovun qalıqlarını daha təhvil verib. İsrail ordusu təsdiqləyib ki, Qızıl Xaç onların nəşini qəbul edib.