BAKI, AzerVoice, Nailə Babazadə

Türkiyə Prezidenti Rəcəb Tayyib Ərdoğan, Şarm əl-Şeyxdə keçirilən Barış Zirvəsində bölgədə davam edən Qəzza böhranı ilə bağlı mühüm qərarların qəbul edildiyini bildirib. Prezidentin sözlərinə görə, “Şarm əl-Şeyx Barış Zirvəsi Niyyət Bəyanatı” bölgədə daimi sülhə aparan yolda yeni bir mərhələ olacaq.

AzerVoice xəbər verir ki, Türkiyə Prezidenti və AK Partiya sədri Rəcəb Tayyib Ərdoğan, AK Partiyanın İqtisadi İşlər üzrə Təlim Proqramında çıxışı zamanı Qəzzada əldə olunan atəşkəsin bölgə üçün mühüm addım olduğunu bildirib.

Ərdoğan qeyd edib ki, Qəzzanın yenidən ayağa qaldırılması uzun illər çəkə bilər

“Hadisənin həm inşa, həm də ihya mərhələsi var. Burada Türkiyəyə mühüm vəzifələr düşür. İki illik ağrı, qətliam və zülmdən sonra Qəzzada atəşkəsin təmin edilməsini çox dəyərli hesab edirik. Qəzzada uşaqların üzündə az da olsa təbəssüm var, analar artıq övladlarını bomba yağacaq qorxusu olmadan küçəyə buraxa bilirlər. Bu, bizim üçün böyük xoşbəxtlikdir.” - deyə Ərdoğan qeyd edib.

Türkiyə lideri bildirib ki, indi əsas məqsəd Fələstinin yaralarını sarmaq və Qəzzanı yenidən dirçəltməkdir.

“İndi hamımız birlikdə Fələstinin yaralarını sarmalı, Qəzzanı yenidən ayağa qaldırmalı və qardaşlarımıza can suyu olmalıyıq. ABŞ başda olmaqla Körfəz ölkələri ilə birlikdə görüşlər keçirəcəyik, müzakirə edəcəyik və atacağımız addımları müəyyənləşdirəcəyik.”- deyə Ərdoğan vurğulayıb.

Ərdoğan çıxışının sonunda əlavə edib ki, qarşıda hələ görüləcək çox iş var və Türkiyənin birinci prioriteti ölkədəki həyat bahalılığı problemini köklü şəkildə həll etməkdir.