BAKI,AzerVoice, Fərid Mikayılov

Şimali Kipr Türk Respublikasının (KKTC) Prezidenti Ersin Tatar ölkəsinin Türkiyə və Azərbaycanla əlaqələrinin gündən-günə daha da inkişaf etdiyini bildirib.

AzerVoice xəbər verir ki, prezident vurğulayıb ki, “Bir millət, üç dövlət” anlayışı getdikcə daha da yayılır və güclənir.

Tatar bu fikirləri 6–7 oktyabrda Azərbaycanın Qəbələ şəhərində keçiriləcək Türk Dövlətləri Təşkilatı (TDT) Dövlət Başçıları Şurasının 12-ci Zirvəsi ərəfəsində jurnalistlərə verdiyi açıqlamada səsləndirib.

KKTC lideri, ölkəsinin TDT-də müşahidəçi üzv qismində iştirak etməsinin əhəmiyyətini vurğulayaraq bildirib ki, Türk dövlətləri ilə əlaqələrin genişlənməsi Kipr türklərinin beynəlxalq səviyyədə daha güclü təmsil olunmasına töhfə verir.

Tatar qeyd edib ki, Şimali Kiprin Şərqi Aralıq dənizindəki strateji mövqeyi Türk dünyası üçün geosiyasi və geostrateji baxımdan mühüm əhəmiyyət daşıyır.

“Biz TDT çərçivəsində daha aktiv rol oynamaq niyyətindəyik. Türk dünyasının birliyinə xidmət edən hər addım bizim üçün qürur mənbəyidir,” – deyə Tatar qeyd edib.

Ersin Tatar, xüsusilə İkinci Qarabağ müharibəsindən sonra Azərbaycanla əlaqələrin daha da gücləndiyini bildirib.

“Azərbaycanın KKTC-yə olan diqqəti və dəstəyi ‘Bir millət, üç dövlət’ anlayışının həm orada, həm də Şimali Kiprdə daha da dərinləşməsinə səbəb olub”- deyə KKTC lideri vurğulayıb.

Tatar əlavə edib ki, Kipr türkləri yalnız Azərbaycan və Türkiyə ilə deyil, digər Türk Dövlətləri Təşkilatına üzv ölkələrlə də əməkdaşlığı genişləndirmək istiqamətində çalışır.