BAKI, AzerVoice

Nyu-Yorkda Kipr məsələsinə dair yüksək səviyyəli görüş keçirilib

AzerVoicexəbər verir ki, Birləşmiş Millətlər Təşkilatının Baş katibi Antonio Quterreşin təşəbbüsü ilə Kipr türkləri və yunanları arasında dialoqu təşviq etmək məqsədilə Nyu-Yorkda ilin ikinci qeyri-rəsmi Kipr sammiti təşkil olunub.

İki gün davam edən görüşdə Kiprdəki son vəziyyət və tərəflər arasında etimadın artırılmasına yönəlmiş addımlar müzakirə edilib. BMT-nin Nyu-Yorkdakı mənzil-qərargahında keçirilən tədbir Quterreşin şam yeməyi ilə başlayıb. Görüşdə Kipr türklərinin lideri Ersin Tatar, Kipr yunanlarının lideri Nikos Kristodoulides, Türkiyənin xarici işlər naziri Hakan Fidan, Yunanıstanın naziri Yorgos İerapetritis və Böyük Britaniyanı təmsil edən dövlət katibi Stiven Doughty iştirak ediblər.

Türkiyə tərəfi Kipr probleminin yalnız iki dövlətli həll yolu ilə mümkün olduğunu vurğulayıb. Türkiyənin xarici işlər naziri Hakan Fidan isə görüşdə AB ilə münasibətlərin normallaşdırılması arzusunu ifadə edib. Bu fikir Kipr yunan lideri tərəfindən “çox maraqlı cümlə” kimi qiymətləndirilib.

Qeyd edək ki, mart ayında bənzər formatlı görüş İsveçrənin Cenevrə şəhərində baş tutmuşdu. Görüşlərdə tərəflər arasında əsas fikir ayrılığı iki dövlətli və federasiya əsaslı həll modelləri üzərində cəmləşir.