BAKI, AzerVoice
Qırğızıstan Respublikasının Əmək, Sosial Müdafiə və Miqrasiya naziri Ravşanbek Sabirov ilə Türkiyənin Ailə və Sosial Xidmətlər naziri Mahinur Özdemir Göktaş arasında İstambulda keçirilən Beynəlxalq Ailə Forumu çərçivəsində görüş baş tutub.
AzerVoice xəbər verir ki, tərəflər arasında keçirilən danışıqlarda əsas diqqət sosial siyasət, yardım proqramları və xüsusi qayğıya ehtiyacı olan əhali qruplarına dəstək məsələlərinə yönəlib.
Görüşdə xeyriyyəçilik və sosial müdafiə sahəsində təcrübə mübadiləsi və əməkdaşlığın inkişaf etdirilməsi əsas müzakirə mövzusu olub.
Görüşdə, Türkiyənin Diyanet Fondu, Sevgi və Qardaşlıq Fondu kimi iri xeyriyyə təşkilatlarının fəaliyyətinə, onların az təminatlı, çoxuşaqlı və yaşlı insanlara dəstək sahəsindəki roluna xüsusi diqqət ayrılıb.
Qırğızıstan tərəfi dövlət və qeyri-hökumət təşkilatları arasında uğurlu koordinasiya modellərinin öyrənilməsində maraqlı olduqlarını bildirib.
Tərəflər münaqişə bölgələrindən qayıdan şəxslərin reabilitasiyası, xüsusilə qadınlar və uşaqlar üçün sığınacaqların yaradılması sahəsində Türkiyənin təcrübəsini önə çəkiblər. Bu təşəbbüslər humanitar yardımın bariz nümunəsi kimi qiymətləndirilib.
Görüşün sonunda tərəflər ortaq sosial layihələrin icrasını koordinasiya etmək üçün birgə işçi qrupun yaradılması, eləcə də ideya və təşəbbüslərin razılaşdırılması məqsədilə müntəzəm onlayn görüşlərin keçirilməsi barədə razılığa gəliblər.
