BAKI, AzerVoice
"SpaceX" şirkətinə məxsus "Dragon" adlı pilotsuz yük kosmik gəmisi Beynəlxalq Kosmik Stansiyadan (BKS) uğurla ayrılıb və Yerə doğru hərəkətə başlayıb. Gəmi elmi tədqiqat materialları və avadanlıqla doludur.
AzerVoice xəbər verir ki, bu barədə NASA məlumat verib.
"ABŞ-ın Şərq Sahili vaxtı ilə saat 12:05-də (Bakı vaxtı ilə 20:05) "Dragon" kosmik gəmisi BKS-in "Harmony" modulunun zenit portundan "SpaceX" idarəetmə mərkəzinin komandası ilə ayrılıb" – deyə məlumatda qeyd olunub.
Gəminin Yer atmosferinə daxil olduqdan sonra, mayın 25-də bazar günü Bakı vaxtı ilə saat 09:45-də Kaliforniya sahilləri yaxınlığında okeana enməsi planlaşdırılır.
Qeyd edək ki, "Dragon" kosmik gəmisi aprelin 22-də təxminən 3 ton yük – ekipaj üçün ərzaq, elmi araşdırma materialları və avadanlıqla birlikdə BKS-ə çatdırılmışdı. Gəmi, aprelin 21-də NASA-nın Florida ştatındakı Kennedi Kosmik Mərkəzinin 39A buraxılış meydançasından "Falcon 9" raketi ilə buraxılmış və bu, "SpaceX"-in BKS-ə yük daşınması üzrə 32-ci kommersiya missiyası olub.