Bakı. AzerVoice:

Qazaxıstan Xarici İşlər Nazirliyi, 6 fevral 2023-cü ildə Türkiyədə baş verən Kahramanmaraş mərkəzli zəlzələlərin birinci ildönümü ilə əlaqədar mesaj yayımlayıb.

AzerVoice-un məlumatına görə, Qazaxıstan Xarici İşlər Nazirliyinin rəsmi saytında dərc olunan mesajda bildirilib ki, ötən il Türkiyənin cənub-şərqində baş verən dağıdıcı zəlzələlər nəticəsində Türk Dövlətləri Təşkilatına üzv dövlətlərin dövlət başçılarının 10-cu Zirvə toplantısı keçirilib. Qazaxıstanın ev sahibliyi ilə paytaxt Astanada keçirilən (TDT) toplantıda fevralın 6-sı "Fəlakət Qurbanlarını Anma və Həmrəylik Günü" elan edilib.

"Belə çətin bir dövrdə Qazaxıstan Türk Dövlətləri Təşkilatına üzv olan digər ölkələrlə birlikdə Türkiyəni ilk dəstəkləyən dövlətlər sırasında olub və türk birliyinin gücünü nümayiş etdirib",- deyə mesajda bildirilib.

Xatırladaq ki, 2023-cü il fevralın 6-da Türkiyədə səhər saatlarında 7.7 və 7.6 bal gücündə iki zəlzələ baş verib. Dərinliyi 7 kilometr olduğu müəyyən edilən zəlzələ Hatay, Qaziantep, Kilis, Osmaniye, Malatya, Adıyaman, Şanlıurfa, Diyarbəkir, Adana və Kahramanmaraş vilayətlərində ciddi dağıntılara səbəb olub. Zəlzələ nəticəsində ölənlərin sayı 50 min 783-ə çatıb.

Aytac Süleymanova

Twitter: a_alieva_