BAKI, AzerVoice, Nailə Babazadə

ABŞ Dövlət katibi Marko Rubio İraqın Baş naziri Məhəmməd Şia əl-Sudani ilə telefon danışığında İraqdakı təhlükəsizlik vəziyyəti və siyasi proseslərlə bağlı məsələləri müzakirə edib.

AzerVoice xəbər verir ki, ABŞ Dövlət Departamentindən verilən açıqlamaya görə, Rubio Sudani ilə telefon əlaqəsi saxlayıb.

Görüş zamanı Rubio Suriyanın şimal-şərqində son vaxtlar yaranmış qeyri-sabitlikdən sonra İŞİD terror təşkilatı üzvlərinin İraqdakı təhlükəsiz obyektlərə köçürülməsi və orada saxlanılması istiqamətində İraq hökumətinin təşəbbüsünü və liderliyini təqdir edib.

İraqdakı təhlükəsizlik vəziyyəti və siyasi proseslərin müzakirə olunduğu görüşdə tərəflər, həmçinin İraqda olan xarici vətəndaşların mənsub olduqları ölkələrə sürətlə qaytarılması (ekstradisiya) və ədalət mühakiməsinə cəlb edilməsi istiqamətindəki diplomatik səyləri dəyərləndiriblər.

Danışıqlar zamanı hökumətin formalaşdırılması prosesi müzakirə edilərkən, İraqın Yaxın Şərqdə sabitlik, rifah və təhlükəsizliyə töhfə verən bir aktora çevrilməsi potensialını reallaşdırmaq istiqamətində ortaq qətiyyət vurğulanıb.

Rubio, həmçinin İranın təsiri altında olan bir idarəçiliyin İraqın milli maraqlarını ön planda tuta bilməyəcəyini, ölkəni regional münaqişələrdən uzaq saxlaya bilməyəcəyini və ABŞ ilə tərəfdaşlığı inkişaf etdirə bilməyəcəyini qeyd edib.