BAKI, AzerVoice
Dünya Bankı (DB), Qətər və Səudiyyə Ərəbistanı Suriyanın bank qarşısındakı təxminən 15,5 milyon dollarlıq borcunu ödədikdən sonra ölkəyə yardım proqramlarını yenidən bərpa edib.
AzerVoice xəbər verir ki, bu haqda Dünya Bankının mətbuat xidməti tərəfindən yayımlanan sənəddə qeyd olunub.
"Suriyanın Dünya Bankı qarşısında təxminən 15,5 milyon ABŞ dolları məbləğində olan borcu ödənilib. Bu borcun ödənişi Səudiyyə Ərəbistanı Krallığı və Qətər Dövləti tərəfindən həyata keçirilib. Beləliklə, Dünya Bankının qüvvədə olan əməliyyat siyasətinə uyğun olaraq ölkənin yardım əməliyyatlarında iştirak etmək hüququ bərpa olunub" - deyə, sənəddə bildirilib.
İlk proqram Suriya vətəndaşlarının elektrik enerjisinə çıxışını təmin etməyə yönələcək. Bank, mərhələli şəkildə yardımların həcmini artıraraq ölkədə təxirəsalınmaz ehtiyacları qarşılamaq və uzunmüddətli inkişafa sərmayə qoymaq niyyətindədir.
Qeyd edək ki, Qətər və Səudiyyə Ərəbistanı aprelin sonunda Suriyanın Dünya Bankı qarşısındakı borcunu ödəməyi öhdələrinə götürüblər. Mayın 8-də Suriyanın maliyyə naziri Məhəmməd Yasir Barniyə bildirib ki, Qətər növbəti üç ay ərzində Suriyada maaş fondu üçün aylıq 29 milyon dollar ayıracaq və bu müddətin uzadılması da mümkün olacaq.
