BAKI, AzerVoice, Nailə Babazadə
Bu gün UEFA Çempionlar Liqasının liqa mərhələsinin 6-cı turu çərçivəsində “Qarabağ” FK doğma meydanda Niderlandın köklü klubu “Ayaks”ı qəbul edəcək.
AzerVoice xəbər verir ki, qarşılaşma Bakıdakı Tofiq Bəhramov adına Respublika Stadionunda keçiriləcək və Bakı vaxtı ilə 21:45-də start götürəcək.
Oyun böyük maraqla qarşılanıb. Klubun məlumatına görə, qarşılaşma üçün artıq 27 mindən çox bilet satılıb və stadionun demək olar ki, tam dolması gözlənilir.
Matçı izləmək üçün Niderlanddan Bakıya 1 400-dən çox Ayaks azarkeşi gəlir. Bu, son illərdə Bakıda keçirilən avrokubok oyunları üçün ən böyük fan səfərlərindən biri hesab olunur.
Görüş hər iki komanda üçün böyük əhəmiyyət daşıyır. “Qarabağ” liqa mərhələsində mövqeyini gücləndirmək üçün qələbəyə oynayacaq. “Ayaks” isə Çempionlar Liqasında ağır mövsüm yaşayır və növbəti mərhələ üçün şansını qorumağa çalışır.
Oyun Sloveniya Futbol Federasiyasından olan hakimlər briqadası tərəfindən idarə olunacaq.