BAKI, AzerVoice, Fərid Mikayılov
Arsenal, İtaliya A Seriyasının yüksələn ulduzlarından Kənan Yıldızın transferi üçün hərəkətə keçib.
AzerVoice xəbər verir ki, İngiltərə klubu türk əsilli futbolçu ilə bağlı ilkin təmasları qurub, lakin Yuventus oyunçusunu satmaq fikrində deyil.
İtaliya mətbuatının məlumatına görə, Arsenal rəhbərliyi 20 yaşlı hücumçunun menecerləri ilə əlaqə yaradıb.
“Qoca sinyora” gənc futbolçunu 80–100 milyon avro aralığında qiymətləndirir.
Yıldızın hazırkı müqaviləsi 2029-cu ilə qədər qüvvədədir. Yuventus isə oyunçunu saxlamaq üçün ona yeni və daha sərfəli şərtlərlə müqavilə təklif etməyə hazırlaşır.
Gənc hücumçu ötən mövsüm “ağ-qara” formada 12 qol və 9 asistlə diqqət çəkmişdi. Cari mövsüm isə artıq 5 oyunda 2 qol və 4 asist göstəricisinə imza atıb. Həm hücumçu, həm də cinah oyunçusu kimi çıxış edə bilən Yıldız Türkiyə millisində də formalaşan əsas oyunçulardan sayılır.