BAKI,AzerVoice, Fərid Mikayılov
Argentina millisinin kapitanı Lionel Messi Buenos Airesdə keçirilən Venesuela oyunu ilə azarkeşlərinə unudulmaz anlar yaşadıb.
AzerVoice xəbər verir ki, 38 yaşlı superulduz Dünya Kuboku seçmələrində iki qol vuraraq 3:0 hesablı qələbədə əsas pay sahibi olub.
Bununla yanaşı, futbolçu Argentina millisində son dəfə meydana çıxa biləcəyini açıqlayıb.
Estadio Monumentalda 80 min azarkeşin önünə çıxan Messi matçın ardından tribunları gəzərək əl sallayıb. Minlərlə azarkeş göz yaşları və alqışlarla onu yola salıb.
“Bu sahədə çox şey yaşadım. Xəyallarım həmişə burada, xalqımın qarşısında bu anı yaşamaq idi. Barselonada illərlə sevgi gördüm, amma ən çox burada, vətənimdə xalqımla birgə yaşamaq istədim” – deyə Messi bildirib.
Messinin karyerasının davamı ilə bağlı suallar açıq qalır. Ulduz futbolçu 2026-cı il Dünya Kubokuna qatılıb-qatılmamaq barədə qərarını vermədiyini vurğulayıb.