BAKI, AzerVoice, Nailə Babazadə
Fənərbağça, UEFA Çempionlar Liqasının pley-off mərhələsinin cavab görüşündə Portuqaliyanın Benfika komandası ilə səfərdə qarşılaşacaq. İstanbulda, Kadıköy stadionunda oynanan ilk oyun 0:0 hesabı ilə başa çatmışdı. Bu oyunun qalibi turnirin qrup mərhələsinə vəsiqə qazanacaq.
AzerVoice xəbər verir ki, Estadio da Luz stadionunda keçiriləcək qarşılaşma avqustun 28-də, saat 23:00-da başlayacaq. Oyun TRT 1 kanalında canlı yayımlanacaq. Matçı Sloveniya Futbol Federasiyasından Slavko Vinçiç idarə edəcək. Ona köməkçilər olaraq Tomaz Klancnik və Andaz Kovaçiç təyin olunub. Qeyd edək ki, Vinçiç ötən mövsüm Trendyol Super Liqasında keçirilən Qalatasaray–Fənərbağça derbisini də idarə etmişdi.
Bu, Fənərbağçanın UEFA Çempionlar Liqasında qrup mərhələsinə yüksəlmək üçün son şansıdır. Əgər İstanbul təmsilçisi Portuqaliyadan qalibiyyətlə dönərsə, 16 il sonra ilk dəfə Avropanın ən nüfuzlu klub turnirində qrup mərhələsinə yüksəlmiş olacaq. Fənərbağça son dəfə 2008–2009 mövsümündə Çempionlar Liqasının qruplarında iştirak etmişdi.
İki komanda daha əvvəl 7 dəfə rəsmi matçlarda qarşılaşıb. Bu qarşılaşmalarda Benfika 3, Fənərbağça isə 2 dəfə qalib gəlib, 2 oyun heç-heçə nəticələnib. Komandalar sonuncu dəfə 2018–2019 mövsümündə UEFA Çempionlar Liqasının 3-cü təsnifat mərhələsində qarşılaşıb. Benfika evdə 1:0 hesabı ilə qalib gəlmiş, İstanbulda isə 1:1 bərabərliklə mərhələni adlamışdı.
Tərəflər bu mövsümün əvvəlində keçirilən Esuebio Kuboku çərçivəsində yoldaşlıq matçında da üz-üzə gəlib. Benfika həmin oyunu 3:2 hesabı ilə qazanıb.
Fənərbağça bu vacib qarşılaşmaya yalnız bir futbolçu itkisi ilə çıxacaq. Komandanın hücumçusu Cenk Tosun zədələndiyi üçün heyətdən çıxarılıb. Onun əvəzinə ilk oyunda olduğu kimi Cengiz Ünder UEFA-ya təqdim olunan heyətə daxil edilib.
Komandanın UEFA-ya verdiyi siyahıda Dieqo Karlos, Mert Hakan Yandaş və Rodriqo Beko yer almayıb.
