BAKI,AzerVoice, Fərid Mikayılov

Avropada elektrik şəbəkəsində yeni genişmiqyaslı kəsintilərin baş verməsi ehtimalı qalmaqdadır. İngiltərə mərkəzli Ember düşüncə mərkəzinin araşdırmasına görə, xüsusilə İber yarımadası ölkələri – İspaniya və Portuqaliya – qitənin enerji sisteminə məhdud bağlantılar səbəbindən daha yüksək risk altındadır.

Xatırladaq ki, 28 aprel tarixində baş verən ümumi elektrik kəsintisi nəticəsində təxminən 60 milyon insan saatlarla işıqsız qalmışdı. İspaniya, Fransa və Mərakeşin dəstəyi ilə 16 saat ərzində şəbəkəni bərpa edib. Portuqaliya isə əsasən daxili resurslarla 10 saata yaxın müddətdə sistemi yenidən işə salıb.

Avropa Elektrik Sistemi Operatorları Birliyinin (ENTSO-E) ilkin hesabatında, kəsintiyə səbəb kimi planlaşdırma xətaları və gərginlik nəzarətindəki zəifliklər göstərilib. Kiberhücum və xarici müdaxilə ehtimalı isə istisna olunub. Yekun hesabatın oktyabr ayında açıqlanacağı gözlənilir.

Ember-in qiymətləndirməsinə əsasən, məhdud elektrik idxalı imkanları səbəbindən İspaniya ilə yanaşı İrlandiya və Finlandiya da yüksək risk daşıyan ölkələr hesab olunur. Portuqaliya isə demək olar ki, tamamilə İspaniya üzərindən enerji idxalına bağlıdır.

Hadisədən sonra Madrid və Lissabon hökumətləri Avropa Komissiyasına müraciət edərək, İber yarımadası ilə Avropa İttifaqının enerji şəbəkəsi arasında daha güclü əlaqələrin qurulması üçün siyasi və maliyyə öhdəliyi tələb ediblər.