BAKI,AzerVoice, Fərid Mikayılov
Mançester Yunaytedin baş məşqçisi Ruben Amorim komandadakı gələcəyini müəyyənləşdirəcək həlledici mərhələyə daxil olub.
AzerVoicexəbər verir ki, İngiltərə mətbuatının məlumatına görə, klub rəhbərlərindən Cim Ratkliff portuqaliyalı mütəxəssisi hələlik dəstəkləsə də, nəticələrin dərhal yaxşılaşmaması halında rəhbərlik dəyişiklik qərarı verə bilər.
Premyer Liqada ilk altı turdan sonra Yunayted cəmi iki qələbə qazanaraq 14-cü pillədə qərarlaşıb, Liqa Kubokunda isə dördüncü liqa təmsilçisi “Qrimsbi”yə məğlubiyyətlə mübarizədən kənar qalıb. Komanda son turda “Brentford” qarşısında yenidən ağır itki yaşayıb ki, bu da həm azarkeşlər, həm də klubun daxilində narazılığı daha da artırıb.
“Old Trafford”da keçiriləcək Sanderlendlə oyun Amorim üçün həlledici olacaq. Premyer Liqaya yeni yüksəlmiş “Qara pişiklər” hazırda əla formada çıxış edir və altıncı pillədə qərarlaşıb. Onların Mançester klubu üzərində qələbəsi xal fərqini yeddiye çatdıra bilər ki, bu da Amorimin istefasını qaçılmaz edə bilər.
Amorim mediada və azarkeşlər arasında artan təzyiqlərə baxmayaraq, taktikasına sadiq qalır:
"Məni ən çox narahat edən odur ki, futbolçularım kənardakı fikirlərə qulaq asır. Amma mən sistemin deyil, oyunun intensivliyi və diqqətin fərq yaratdığına inanıram. Qələbə qazansaq, hər şey qaydasında olur, məğlub olsaq isə hər şey sual altına düşür."
Lakin klub daxilindən yayılan məlumatlara görə, bir çox futbolçu artıq portuqaliyalı mütəxəssisin rəhbərliyinə inamını itirməyə başlayıb. Komandanın kapitanı Bruno Fernandes də mövsümün startında açıq şəkildə narazı görüntü sərgiləyib.
Ruben Amorim-in istefası klub tarixində Ser Aleks Ferqyusonun gedişindən sonra altıncı baş məşqçi dəyişikliyi olacaq. Onunla yolların ayrılması təxminən 12 milyon funt sterlinqə başa gələcək ki, bu da son on ildə məşqçi dəyişikliklərinə sərf edilən böyük vəsaitlərə yeni bir yük əlavə edəcək.
Sanderlendlə oyundan sonra isə Yunayted daha çətin sınağa çıxacaq – beynəlxalq fasilədən dərhal sonra əzəli rəqib “Liverpul”la qarşıdurma. Bu səbəbdən Amorim üçün vəzifə sadə, lakin çətin görünür: qalib gəlmək və mütləq nəticə əldə etmək.