BAKI, AzerVoice, Fərid Mikayılov

UEFA Çempionlar Liqasının Liqa mərhələsinin ikinci turunda Danimarkanın Kopenhagen klubunu 2:0 hesabı ilə məğlub edən Qarabağın baş məşqçisi Qurban Qurbanov qarşılaşmadan sonra fikirlərini bölüşüb.

AzerVoice xəbər verir ki, Qurbanov futbolçuların göstərdiyi iradəni yüksək qiymətləndirib.

“Futbolçularımı və azarkeşlərimizi təbrik edirəm. Bu gün sanki meydanda birlikdə, bir-birilərinin arxasında idilər. Belə böyük turnirlərdə elə an olur ki, ona dözmək lazım gəlir. Bunu ikinci hissədə etdik. Rəqib riskə getdi, bəzi top itkilərimiz oldu. Amma bu cür mübarizə bizə qarşıdakı oyunlarda böyük fayda verəcək”- deyə o bildirib.

Baş məşqçi iki turun ardından toplanan 6 xal barədə də danışıb.

“Məndə bu uğura inam həmişə olub. Keçən il yaxşı oyunlarımız olsa da, yalnız bir qələbə qazandıq. İnanırdım ki, oyunumuzu qoruyub saxlasaq, bu mövsüm daha yaxşı nəticələr əldə edəcəyik. Ortada çox gözəl göstərici var. Həmişə futbolçularıma inam aşılamağa çalışıram”- deyə Qurbanov vurğulayıb.

Qurbanov Qarabağın Çempionlar Liqasının liderlər qrupunda qərarlaşmasını tarixi uğur adlandırıb.

“Biz Azərbaycanın Qarabağıyıq. Bu uğura sevinirəm. Cənab Prezident də bizi təbrik edib. Bu, məsuliyyətimizi daha da artırır. Daha çox inanaraq, güvənərək çalışıb irəli getməliyik”- deyə baş məşqçi qeyd edib.