BAKI, AzerVoice

Azərbaycan təmsilçisi Qarabağ Futbol Klubu İtaliyanın tanınmış və köklü klublarından biri olan Udineze ilə rəsmi əməkdaşlığa başlayıb.

AzerVoice xəbər verir ki, tərəflər arasında bir müddətdir davam edən danışıqlar artıq strateji tərəfdaşlıq formatına keçib.

Əməkdaşlığın ilkin mərhələsində əsas diqqət akademiyalararası bilik və təcrübə mübadiləsinə yönəldilib. Razılaşmaya əsasən, Qarabağ FK-nın akademiya üzvləri dövri olaraq Udineze klubunun təlim-məşq toplanışlarında iştirak edəcəklər. Bu, gənc futbolçuların Avropa səviyyəsində inkişafı, texniki və taktiki baxımdan biliklərinin artırılması üçün mühüm fürsət kimi dəyərləndirilir.

Bu strateji tərəfdaşlığın qurulmasında Qarabağ FK-nın prezidenti Tahir Gözəlin şəxsi təşəbbüsü və İtaliya klubunun sahibi Pozzo ailəsi ilə olan dostluq münasibətləri həlledici rol oynayıb.

Tərəflər arasında əməli əməkdaşlıq yay fasiləsindən sonra yeni mövsümün əvvəlində başlayacaq. Bu çərçivədə Qarabağ FK Akademiyasının üzvləri İtaliyaya göndəriləcək. Əməkdaşlıq yalnız futbolçularla məhdudlaşmayacaq gələcəkdə məşqçilər və klub idarəçiləri arasında qarşılıqlı təcrübə mübadiləsi, departamentlər üzrə bilik paylaşımı və birgə layihələrin həyata keçirilməsi də nəzərdə tutulur.

Qeyd edək ki, Udineze klubu ötən ilin noyabrında Bakıda Qarabağ FK və Avropa Klublar Assosiasiyası (ECA) tərəfindən COP29 Sədrliyinin və BMT-nin İqlim Dəyişmələri üzrə Çərçivə Konvensiyasının (UNFCCC) dəstəyi ilə yaradılan iqlim alyansı ilə bağlı bəyannaməni imzalayan klublardan biridir.

Bu əməkdaşlıq Qarabağ FK-nın beynəlxalq arenada daha aktiv mövqeyə yiyələnməsi və gənc futbolçularının qlobal səviyyədə inkişafına xidmət edən mühüm addım kimi qiymətləndirilir.