BAKI, AzerVoice
İngiltərə Premyer Liqasının 35-ci turunda baş tutan oyunda "Çelsi" çempionluğu öncədən təmin etmiş "Liverpul"u 3:1 hesabı ilə məğlub edib. Görüş London şəhərində keçirilib.
AzerVoice xəbər verir ki,"Çelsi"nin qollarını Enso Fernandes (3-cü dəqiqə), penalti zərbəsindən Koul Palmer (90+6) və "Liverpul"un oyunçusu Cerrel Kvansa (56-cı dəqiqədə avtoqol) vurublar. Qonaqlardan isə Vircil Fan Dayk 85-ci dəqiqədə fərqlənib. Qeyd edək ki, Palmer bu görüşdə yanvarın 14-dən sonra ilk qolunu vurub. Həmin tarixdə o, "Bornmut"la oyunda (2:2) qol sevinci yaşamışdı.
Bu, "Çelsi"nin "Liverpul"a qarşı 2021-ci ildən bəri ilk qələbəsidir. Bu iki komanda arasında baş tutmuş 199-cu qarşılaşma olub. Bu müddət ərzində "Çelsi" 67 dəfə qalib gəlib, "Liverpul" 83 dəfə, 49 görüş isə heç-heçə ilə başa çatıb.
Xatırladaq ki, "Liverpul" 34-cü turda "Tottenhem" üzərindəki 5:1 hesablı qələbə ilə çempionluğunu vaxtından əvvəl təmin etmişdi. Komanda 35 oyundan sonra 82 xal toplayıb. "Çelsi" isə bu qələbə ilə 63 xalla turnir cədvəlində beşinci yerə yüksəlib.
Növbəti turda, mayın 11-də "Çelsi" səfərdə "Nyukasl"la qarşılaşacaq. Eyni gündə "Liverpul" turnir cədvəlində ikinci yerdə qərarlaşan "Arsenal"ı qəbul edəcək. Bundan əlavə, mayın 8-də "Çelsi" Konfrans Liqasının yarımfinal mərhələsində İsveçin "Yurqorden" klubu ilə cavab oyununu keçirəcək. İlk matç 4:1 hesabı ilə London təmsilçisinin xeyrinə başa çatıb.
