BAKI, AzerVoice

ABŞ Prezidenti Donald Tramp, dövlət katibi Marko Rubionun milli təhlükəsizlik üzrə prezidentin köməkçisi vəzifəsini daimi olaraq icra edə biləcəyini istisna etməyib.

AzerVoice xəbər verir ki, bu barədə Tramp "NBC News" telekanalına verdiyi müsahibədə bildirib.

“Bəli, o bunu edə bilər. Rubio özü də bu iki vəzifəni birləşdirərək işləməyin necə olduğunu anlamaq istəyəcək, çünki bu, bir qədər fərqli məsuliyyətlər tələb edir. Hələlik bu işi o icra edəcək” – deyə Tramp qeyd edib.

ABŞ lideri xatırladıb ki, 1973–1975-ci illər arasında bu iki vəzifəni eyni anda Henriki Kissincer də icra edib.

“Bu vəzifələr üçün iki nəfərə ehtiyac olmadığına dair nəzəriyyə var, lakin düşünürəm ki, bu işlərin öhdəsindən uğurla gələ biləcək bir neçə böyük şəxs var” – deyə, o əlavə edib.

Tramp həmçinin vurğulayıb ki, prezidentin milli təhlükəsizlik üzrə köməkçisi vəzifəsini tərk edən Mayk Uoltsun ABŞ-ın BMT-dəki daimi nümayəndəsi postuna təyin edilməsi bir cəza deyil.

“Xeyr, mən düşünürəm ki, o yeni vəzifəsində yaxşı işləyəcək” – deyə, Tramp qeyd edib.

Xatırladaq ki, Politico qəzetinin verdiyi məlumata görə, Ağ Ev planlaşdırır ki, Marko Rubio ən azı altı ay müddətində həm dövlət katibi, həm də milli təhlükəsizlik üzrə prezidentin köməkçisi kimi fəaliyyət göstərsin. Bu təklifi ona şəxsən Tramp və onun administrasiya rəhbəri edib.