BAKI,AzerVoice
UEFA Çempionlar Liqasının yarımfinal mərhələsinin ilk oyununda İspaniya təmsilçisi Barselona öz evində, Lluis Companys Olimpiyat Stadionunda İtaliya klubu İnter ilə qarşılaşaraq 3-3 hesablı heç-heçə edib.
AzerVoice xəbər verir ki, matçın daha 30-cu saniyəsində İnter sürətli qolla önə keçib.
Marcus Thuram zərif daban zərbəsi ilə vurduğu qolla komandasını 1-0 hesablı üstünlüyə çıxarıb və Çempionlar Liqası yarımfinallarında ən sürətli qol rekordunu qeydə alıb. 21-ci dəqiqədə küncdən gələn topu vole ilə qapıya göndərən Denzel Dumfries hesabı 2-0 edib.
Barselona 24-cü dəqiqədə sağ cinahda effektiv oynayan Lamin Yamalın gözəl qolu ilə fərqi azaldıb (2-1), 38-ci dəqiqədə Ferran Torresin qolu ilə hesabı bərabərləşdirib (2-2). Yamal bu qolla Çempionlar Liqası yarımfinallarında qol vuran ən gənc futbolçu adına yiyələnib. 17 yaş 291 günlük olan Yamal, Kilian Embappenin 18 yaş 140 günlük rekordunu keçib.
İlk hissə 2-2 hesablı bərabərliklə başa çatıb.
İkinci yarıda İnter yenidən önə keçib. 64-cü dəqiqədə Hakan Çalhanoğlunun künc zərbəsindən verdiyi ötürməni Denzel Dumfries başla qola çevirərək hesabı 3-2 edib. Lakin Barselona dərhal cavab verib. 65-ci dəqiqədə Raphinhanın cərimə meydançasından kənarından sərt zərbəsi üst dirəyə dəyərək qapıçı Yann Sommerə çırpılıb və top qapıya daxil olub (3-3).
Qalan dəqiqələrdə başqa qol olmayıb və gərgin keçən matç 3-3 bərabərliyi ilə yekunlaşıb.
Bu cütün cavab oyunu 6 may tarixində Milanda keçiriləcək.
