BAKI, AzerVoice, Nailə Babazadə
Misir, İsrail və Həmasa Şarm əl-Şeyx şəhərində imzalanan Qəzzada atəşkəs sazişinə əməl etməyə çağırıb.
AzerVoice xəbər verir ki, Misir Xarici İşlər Nazirliyinin yaydığı yazılı açıqlamaya görə, nazir Bədr Əbdülati Fransa xarici işlər naziri Jan-Noel Barro və Danimarka xarici işlər naziri Lars Lökke Rasmussenlə telefonla danışıb.
Əbdülati qeyd edib ki, Şarm əl-Şeyx şəhərində imzalanan Qəzzada atəşkəs razılaşmasına tərəflərin əməl etməsi son dərəcə vacibdir.
Nazir bildirib ki, razılaşmaya əməl olunması atəşkəsin möhkəmləndirilməsi və hücumların daimi şəkildə dayandırılması üçün əsas addımdır. O, həmçinin Qəzza zolağına humanitar yardımın tam şəkildə çatdırılmasının vacibliyini vurğulayıb.
Əbdülati fransalı və danimarkalı həmkarları ilə söhbətində gələn ay Misirdə keçirilməsi planlaşdırılan “Qəzzənin Yenidən Qurulması Konfransı”nın hazırlıqlarını da müzakirə edib.
O, Fələstin xalqının hüquqlarını qoruyan genişmiqyaslı bir baxış çərçivəsində Qəzzanın bərpası planlarının mümkün qədər tez həyata keçirilməsinin vacibliyinə diqqət çəkib. Əlavə edib ki, bu proses mart ayında qəbul edilən “Ərəb-İslam Yenidənqurma Planı” və ABŞ prezidenti Donald Trampın Yaxın Şərq sülh planı çərçivəsində həyata keçiriləcək.
Əbdülati Avropa ölkələrini də konfransda aktiv iştirak etməyə çağırıb.
Qeyd edək ki, 4 martda Qahirədə keçirilən Fövqəladə Ərəb Liqası Zirvəsində Fələstinliləri yerindən etmədən Qəzza zolağının yenidən qurulmasını nəzərdə tutan “Ərəb Planı” qəbul olunmuş və planın 5 ilə yayılaraq təxminən 53 milyard dollara başa gələcəyi bildirilmişdi.
Fransa və Danimarka xarici işlər nazirləri də “Misirin bölgədə sabitliyin təmin olunması üçün göstərdiyi səyləri tam dəstəklədiklərini” bildirib və Qəzzanın yenidən qurulması üzrə keçiriləcək beynəlxalq konfransa hazırlıq çərçivəsində Misirlə əməkdaşlığın davam etdirilməsində maraqlı olduqlarını qeyd ediblər.
Xatırladaq ki, bu səhər İsrail əsgərləri atəşkəsə baxmayaraq, Qəzza zolağının şimalında yerləşən Qəzza şəhərinin şərq hissəsinə hücum edib və nəticədə daha 2 fələstinli həyatını itirib.
İsrail ordusu isə bildirib ki, Qəzzada atəşkəs və əsir mübadiləsi razılaşmasına əsasən, xəritədə müəyyən edilmiş, lakin ərazidə dəqiq sərhədləri bəlli olmayan “sarı xətti” keçdiyi iddia edilən fələstinlilərə atəş açıblar.
Qəzza hökuməti dünən verdiyi açıqlamada bildirib ki, İsrail ordusu 10 oktyabrda elan edilən atəşkəs qərarından bəri 80 pozuntu həyata keçirib, bu hücumlarda 97 fələstinli həlak olub və azı 230 nəfər yaralanıb.
ABŞ prezidenti Donald Tramp 9 oktyabrda Misirdə aparılan danışıqlarda İsrail və HƏMAS-ın Qəzzada atəşkəs planının ilk mərhələsini təsdiqlədiyini açıqlamışdı.
Misirdə aparılan danışıqlarda razılaşma imzalandıqdan sonra İsrail hökumətinin təsdiqi ilə 10 oktyabrda saziş qüvvəyə minib.
Razılaşmaya əsasən, İsrail ordusu “Sarı Xətt”dən geri çəkildikdən sonra Qəzza zolağında atəşkəs həmin gün saat 12:00-da qüvvəyə minib.