BAKI, AzerVoice

Səudiyyə Ərəbistanı ABŞ-dan 200 pilotsuz aparat almaq üçün danışıqlara başlayıb.

AzerVoice xəbər verir ki, Baykar ilə AKINCI TİHA-nın istehsalına dair milyard dollarlıq razılaşmadan sonra Səudiyyə Ərəbistanı ABŞ istehsalı olan MQ-9 tipli pilotsuz uçuş aparatlarının alınması üçün yeni addım atıb.

Ər-Riyad administrasiyası General Atomics şirkəti ilə təxminən 200 ədəd PUA-nın alınması üçün danışıqlar aparır.

Xatırladaq ki, Səudiyyə Ərəbistanı 2023-cü ilin iyulunda Baykar ilə 3 milyard dollarlıq müqavilə imzalayaraq AKINCI TİHA-nı öz ərazisində istehsal etməyə razılaşmışdı. Bu yeni təşəbbüs isə ölkənin PUA sahəsində paralel strateji xətt izlədiyini göstərir.

General Atomics-in sözçüsü Mark Brinkli ABŞ mediasına bildirib ki, danışıqlar çərçivəsində Səudiyyəyə MQ-9B SkyGuardian modellərinin də daxil olduğu genişmiqyaslı paket təklif olunur. Onun sözlərinə görə, bu alış-veriş ABŞ iqtisadiyyatına mühüm təsir göstərə və 46 min yeni iş yerinin yaradılmasına səbəb ola bilər.

Müdafiə analitikləri bu razılaşmanı Səudiyyə Ərəbistanının hava gücündə köklü transformasiya planının tərkib hissəsi kimi dəyərləndirir. Analitik Kristian Alexander bildirib ki, 200 PUA-lıq bu tələbat sırf taktiki deyil, strateji məqsədlərə – geniş ərazinin nəzarətdə saxlanması, regional təhdidlərin qarşısının alınması və silahlı qüvvələrin bütün sahələrini əhatə edən inteqrasiya olunmuş pilotsuz sistemlərin qurulmasına yönəlib.

Qeyd edək ki, General Atomics-in icraçı direktoru David Alexander də fevral ayında bu alışı şirkətin tarixində ən böyük beynəlxalq müqavilə ola biləcək bir layihə kimi qiymətləndirmişdi.

Müşahidəçilər bu addımı Səudiyyənin bir müddət Çin və Türkiyə ilə hərbi əməkdaşlıq axtarışlarından sonra ABŞ-la strateji bağlarını yenidən gücləndirməsi kimi qiymətləndirir.