BAKI, AzerVoice

ABŞ Prezidenti Donald Trampın Səudiyyə Ərəbistanına səfəri çərçivəsində ABŞ və Səudiyyə rəsmiləri F-35 qırıcılarının Ər-Riyada mümkün satışını müzakirə ediblər.

AzerVoice xəbər verir ki, bu barədə Reuters agentliyi məlumat yayıb.

Məlumata görə, Səudiyyə Ərəbistanı artıq bir neçə ildir ki, ABŞ istehsalı olan F-35 qırıcıları ilə maraqlanır. Mənbələrə görə, hazırda Vaşinqtonun bu təyyarələrin satışına icazə verib-verməyəcəyi bəlli deyil.

ABŞ və Səudiyyə Ərəbistanı Vaşinqtonun İsrailə ərəb ölkələrindən daha üstün silah sistemləri verməsi ilə bağlı zəmanət məsələsini də müzakirə ediblər.

Qeyd edək ki, Tramp yanvar ayında vəzifəyə başladıqdan sonra bugün ilk rəsmi səfəri ilə Səudiyyə Ərəbistanına gəlib. Bu səfər çərçivəsində Tramp Qətər və Birləşmiş Ərəb Əmirliklərini də ziyarət edəcək.

Səfər zamanı ABŞ və Səudiyyə Ərəbistanı strateji iqtisadi tərəfdaşlıq haqqında saziş imzalayıblar. Bu saziş energetika, müdafiə, mədən sənayesi, kosmos və səhiyyə sahələrində əməkdaşlığın genişləndirilməsini nəzərdə tutur. Yeni razılaşma çərçivəsində tərəflər gələcək müdafiə imkanlarına dair niyyət məktubu və həmçinin energetika, mineral resurslar və kosmosun tədqiqi sahəsində anlaşma memorandumları imzalayıblar.