BAKI, AzerVoice, Nailə Babazadə
Nəsiminin Hələbdəki məzarı Türkmən kimliyinin simvoludur.
Bu barədə AzerVoice-a özəl açıqlamasında Suriya–Azərbaycan Dostluq Dərnəyinin sədri, Dr. Muxtar Fatih Beydili məlumat verib.
O Nəsiminin Hələbdəki məzarının təkcə bir şəxsin qəbri olmadığını, həm də ortaq Türk-İslam mədəniyyətinin və türkmən kimliyinin canlı bir simvolu olduğunu vurğulayıb.
“Harada bir məzar daşımız varsa, orası bizim torpağımızdır. Nəsiminin Hələbdəki məzarı bizə miras və əmanət kimi qalıb. Oradakı insanlar da bu əmanətə sahib çıxır və hər zaman da çıxacaqlar.” - deyə Muxtar Fatih Beydili qeyd edib.
Beydili qeyd edir ki, Nəsimi yalnız Azərbaycan ədəbiyyatının deyil, bütövlükdə Türk-İslam dünyasının ortaq dəyərlərindən biridir və onun məzarı Suriyadakı türkmənlər üçün kimlik və mənsubiyyətin konkret bir təcəssümüdür.
Dr. Beydili tarix anlayışının yalnız yazılı mətnlərlə məhdudlaşmadığını, mədəni yaddaşın məzar daşları, abidələr və müqəddəs məkanlar kimi simvollarda da yaşadığını söyləyir. “Nəsiminin Hələbdəki məzarı türkmənlərin köklərinin və bu torpaqlardakı mövcudluğunun canlı şahididir. Onun dərisinin soyularaq şəhid edilməsi isə türkmən xalqının tarix boyu zülmlərə qarşı göstərdiyi dirənişin simvoludur.”
O əlavə edir ki, bu məzar təkcə Suriya türkmənləri üçün deyil, ümumilikdə Suriyanın mədəni və tarixi quruluşunun əhəmiyyətli bir hissəsidir. Azərbaycanda Nəsimiyə göstərilən böyük maraq və onun Bakıya gətirilməsi mədəni sahiblənmə kimi görünə bilər, lakin bunun eyni zamanda Suriya türkmənlərinin tarixi dəyərdən məhrum edilməsi ilə nəticələnə biləcəyini də qeyd edir.
“Onun məzarı olduğu yerdə bərpa olunmalı və Azərbaycanın üçrəngli bayrağı orada dalğalanmalıdır,” – deyə Fatih Beydili vurğulayır.
Nəsiminin həm Azərbaycana, həm də türkmənlərə aid olduğunu qeyd edən Beydili əlavə edir ki, “Necə ki, İraq torpaqlarında doğulan Füzuli Azərbaycan şairidirsə, eyni şəkildə Bağdadda doğulmuş olsa da Nəsimi də həm Azərbaycana, həm də türkmənlərə aiddir. İraq və Suriyadakı türkmənlər də Azərbaycan türkləri kimi Oğuz tayfasına mənsubdur.”