BAKI, AzerVoice, Nailə Babazadə

BMT-nin Uşaq Fondu (UNICEF) Qəzza zolağında yaşayan uşaqların acınacaqlı vəziyyəti ilə bağlı həyəcan təbili çalaraq dəhşətli hesabat yayıb.

AzerVoice xəbər verir ki, təşkilatın sözçüsü Ceyms Elderin verdiyi məlumata görə, 2025-ci ilin oktyabrında əldə edilmiş atəşkəs razılaşmasına baxmayaraq, bölgədə hər gün orta hesabla bir uşaq həyatını itirir. Atəşkəs dövründə həlak olan uşaqların ümumi sayı artıq 100-ə çatıb.

Qəzzada uşaqlar təkcə hərbi hücumların deyil, həm də kəskin soyuq hava şəraitinin qurbanına çevrilirlər. Hesabatda qeyd olunur ki, bu qış mövsümündə ən azı 9 uşaq kəskin soyuqdan (hipotermiya) vəfat edib. Ölənlərdən sonuncusunun cəmi 7 aylıq körpə olduğu bildirilir. Güclü külək və yağışlar dəniz sahilindəki dayanıqsız çadırları dağıdır, uşaqlar isə isinmək üçün heç bir vasitəyə malik deyillər. İki ildən artıq davam edən qida çatışmazlığı uşaqların immun sistemini tamamilə zəiflədib və onları xəstəliklərə qarşı müdafiəsiz qoyub.

UNICEF rəsmisi vurğulayıb ki, İsrail hakimiyyəti hələ də bölgəyə həyati əhəmiyyət kəsb edən dərmanların və yemək bişirmək üçün qazın daxil olmasına mane olur. Təhsil sahəsindəki vəziyyət də ürəkağrıdıcıdır; məktəblərin dağıdılması səbəbindən hazırda Qəzzada hər beş uşaqdan yalnız biri təhsilini davam etdirə bilir. Elderin sözlərinə görə, uşaqların gələcəyi göz görə-görə məhv edilir.

İsrailin "Sərhədsiz Həkimlər" kimi beynəlxalq humanitar təşkilatların fəaliyyətini məhdudlaşdırmaq və ya qadağan etmək qərarları Qəzzadakı böhranı daha da dərinləşdirir. UNICEF yardımların qeyri-məhdud şəkildə bölgəyə çatdırılmasının vacibliyini xatırladaraq, uşaqların həyatını xilas etmək üçün təcili addımlar atılmalı olduğunu bəyan edib.