BAKI,AzerVoice,Fərid Mikayılov

Suriya Xarici İşlər naziri Əsəd Həsən Şeybani Rusiyanın uzun illər dəstək verdiyi Bəşşar Əsəd rejimini niyə tərk etdiyini ilk dəfə bütün detalları ilə açıqlayıb.

AzerVoice xəbər verir ki, Şeybaninin açıqlamasına görə, rejimə qarşı mübarizənin intensivləşdiyi dövrdə Suriya tərəfi Rusiyanın yüksək səviyyəli nümayəndəsi ilə görüşlərə başlayıb.

Şeybani bu şəxsin sanki Vladimir Putinlə birbaşa danışırmış kimi təsir yaratdığını bildirib.

Bab əl-Hava Sərhəd Keçid Məntəqəsində kritik görüş

Suriya nümayəndələri Bab əl-Hava sərhəd keçid məntəqəsində Rusiya rəsmiləri ilə üzbəüz görüşüb. Şeybaninin sözlərinə görə, bu görüşdən sonra vəziyyət kökündən dəyişib. Görüşdə vasitəçi şəxs Suriya tərəfinə bildirib: “Putin açıqlamanı oxudu, bəyəndi və mesajın mənasını anladıq.”

Şeybani əlavə edib ki, görüşdə Suriya tərəfi Rusiyaya mesaj verib: “Biz Suriya xalqıyıq və dəyişimi seçdik. Rusiyanın rejimlə ittifaqı səhv idi, amma səhvlər düzəldilə bilər. Bu mövqe yenidən nəzərdən keçirilə və yeni bir tərəfdaşlıq qurula bilər – etibarsız bir rejimlə deyil, xalqla.”

Rusiyanı razı salan ifadə

Şeybaninin sözlərinə görə, Moskvanı Əsədi dəstəkələməkdən imtinaya, inandıran əsas amil Suriya xalqına xidmət edəcəyi təqdirdə hərbi mövcudluğunu qoruyacağı mesajı olub. Şeybani ruslara deyib: “Bəşşar Əsədi devirmək Rusiyanın Suriyadan ayrılması demək deyil. Gələcəyinizi Əsədə bağlamayın. O keçicidir. Qurula biləcək yeni bir hökumət var.”

Bu ifadələrdən sonra Rusiya Əsəd rejiminə dəstək verməyib. Şeybani əlavə edib ki, Suriya tərəfi Rusiyaya rejimin artıq sona çatdığını izah etməyə də kömək istəmişdi.

Rus nümayəndələr Şeybanidən “Dəməşqə nə qədər müddətdə çatacaqsınız?” soruşduqda Suriya tərəfi “48 saat” cavabını verib. Bu cavabdan sonra Moskva qüvvələri Dəməşqdən geri çəkilməyə başlayıb.

Həmçinin qeyd edək ki, Türkiyə Xarici İşlər naziri Hakan Fidan əvvəllər verdiyi açıqlamada, Rusiyanı Əsəddən vaz keçməyə inandırmağın yolunu bir sözlə izah etmişdi: “Danışdıq”.