BAKI, AzerVoice, Nailə Babazadə

İranın səhiyyə naziri Məhəmməd Riza Zəfərkəndi bildirib ki, hava çirkliliyi hər il təxminən 50 min insanın ölümünə səbəb olur.

AzerVoice xəbər verir ki, Zəfərkəndi universitet rektorları ilə keçirdiyi görüşdə hava çirkliliyi ilə bağlı açıqlamalar verib.

O, səhiyyə sahəsindəki problemlərin böyük ölçüdə iqtisadi və sosial amillərdən qaynaqlandığını vurğulayıb.

“Problemlərdən biri də hava çirkliliyidir. Hər il 50 min insanın hava çirkliliyinə bağlı olaraq həyatını itirdiyinə şahid oluruq. Eyni zamanda, xəstəxanalara müraciətlər iki dəfə artıb.” - deyə Zəfərkəndi qeyd edib.

Zəfərkəndi universitetlərin səhiyyə ilə bağlı məsələlərə problem yönümlü yanaşması lazım olduğunu bildirib.

“Səhiyyə elmlərində irəliləmək istəyiriksə, mütəxəssislər universitetlərə dəstək olmalıdır. Səhiyyə sahəsində böyük maliyyə imkanları mövcuddur.” - deyə əlavə edib.

İranda hava çirkliliyi əsasən istehsal olunan aşağı keyfiyyətli benzindən qaynaqlanır.

Aşağı keyfiyyətli benzin, köhnə model avtomobillər, motosikllər və enerji stansiyalarında yanacaq kimi istifadə edildikdə insan həyatı üçün zərərli qazların havaya buraxılmasına səbəb olur.

İran hava çirkliliyinə qarşı hibrit mühərrik istehsalı, elektrikli motosikllərin paylanması və Euro 5 standartlı benzinin istehsalı kimi müxtəlif tədbirlər görsə də, hələ tam uğur qazana bilmir.