BAKI, AzerVoice, Nailə Babazadə

ABŞ Dövlət Katibi Marko Rubio Ukraynada münaqişənin sona çatdırılması üçün hazırlanan sülh planı ilə bağlı mühüm irəliləyiş əldə edildiyini, lakin hələ görüləcək işlərin çox olduğunu bildirib.

AzerVoice xəbər verir ki, Rubio, Florida ştatında Ukrayna heyəti ilə görüşərək Rusiyanın Ukraynaya qarşı apardığı müharibəni bitirmək məqsədilə hazırlanan sülh planı üzrə danışıqlar aparıb. Görüşdən sonra Ukrayna Milli Təhlükəsizlik və Müdafiə Şurasının katibi Rüstəm Umerovla mətbuat konfransında danışan Rubio, verimli bir müzakirə keçirdiklərini qeyd edib.

“Biz yalnız müharibəni sona çatdırmaq istəmirik, həm də Ukraynanın bir daha işğal ilə qarşılaşmayacaq şəkildə təhlükəsiz olmasını və ölkənin real rifaha qovuşmasını istəyirik”, – Rubio deyib.

ABŞ tərəfindən təklif olunan sülh planı üzrə müəyyən irəliləyiş əldə etdiklərini bildirən Rubio əlavə edib: “Bu həssas və mürəkkəb bir məsələdir, buna görə hələ görüləcək çox işimiz var.”

Ukrayna heyətinə rəhbərlik edən Rüstəm Umerov isə ABŞ-ın sülh danışıqlarındakı liderliyinə təşəkkürünü ifadə edib.