BAKI, AzerVoice, Nailə Babazadə
Türkiyənin Milli Müdafiə Nazirliyi (MSB) Ukraynaya türk əsgərinin göndəriləcəyi ilə bağlı iddialara aydınlıq gətirib. Açıqlama, Nazirlikdə keçirilən həftəlik mətbuat brifinqindən sonra jurnalistlərin suallarına cavab verilərkən səsləndirilib.
AzerVoice xəbər verir ki, Türkiyə MN rəsmiləri bildiriblər ki, harada barış və sabitlik ehtiyacı yaranırsa, ilk olaraq Türk Silahlı Qüvvələrinin xatırlanması TSQ-nin imkan və qabiliyyətlərinin, eləcə də yüksək deterrent gücünün göstəricisidir.
Nazirlik vurğulayıb ki, Ukraynaya hər hansı hərbi qüvvə göndərilməsi üçün ilk növbədə Rusiya və Ukrayna arasında atəşkəsin təmin olunması şərtdir. Bundan sonra mümkün missiyanın mahiyyəti, çərçivəsi və hansı ölkənin nə qədər töhfə verəcəyi dəqiq müəyyən edilməlidir.
Açıqlamada əlavə olunub ki, Türk Silahlı Qüvvələri bölgədə təhlükəsizlik və sabitlik yaratmağa yönəlmiş hər bir təşəbbüsə töhfə verməyə hazırdır.