BAKI, AzerVoice, Fərid Mikayılov
Ukrayna Prezidenti Volodimir Zelenski ölkənin yeni tərkibdə formalaşdırılmış nümayəndə heyətinin ABŞ-a sülh danışıqları aparmaq üçün artıq yola düşdüyünü açıqlayıb.
AzerVoice xəbər verir ki, heyətə Ukraynanın Təhlükəsizlik və Müdafiə Şurasının (SNBO) katibi Rustem Umerov rəhbərlik edir.
Zelenski bildirib ki, yeni heyətin qarşısında “münaqişənin başa çatdırılması üçün atılacaq addımların operativ və məzmunlu şəkildə hazırlanması” kimi konkret vəzifə qoyulub.
“Ukrayna Amerika ilə maksimum konstruktiv şəkildə işləməyə davam edir. Cenevrədə keçirilən görüşlərin nəticələrinin indi ABŞ-da tamamlanacağına ümid edirik” - deyə Zelenski qeyd edib.
Ukrayna və ABŞ nümayəndələrinin görüşü noyabrın 30-da, bazar günü baş tutacaq.
Əvvəlki komandanın dəyişikliyi
Sülh danışıqlarında Ukraynanı daha əvvəl Prezident Administrasiyasının keçmiş rəhbəri Andrey Yermak təmsil edirdi. Lakin onun adı genişmiqyaslı korrupsiya qalmaqalında hallandıqdan sonra istefaya göndərilib.