BAKI, AzerVoice, Nailə Babazadə

İran Respublikası Xarici İşlər Nazirliyi, Beynəlxalq Atom Enerjisi Agentliyinin (IAEA) İdarə Heyətinin (BoG) İranın sülh məqsədli nüvə proqramı ilə bağlı qəbul etdiyi qətnaməni qanunsuz və əsassız adlandırıb. Nazirliyin bəyanatında qətnamənin ABŞ, Almaniya, Fransa və Böyük Britaniyanın təzyiqi ilə qəbul edildiyi qeyd olunub.

AzerVoice xəbər verir ki, qətnamə 20 noyabr 2025-ci il tarixində üç Avropa ölkəsi (Fransa, Böyük Britaniya, Almaniya) tərəfindən ABŞ-ın dəstəyi ilə irəli sürülüb və 19 səs lehinə, 12 bitərəf və 3 əleyhinə olmaqla qəbul edilib.

Nazirlik bildirib ki, bu addım Qərb ölkələrinin beynəlxalq qurumları öz maraqları üçün istifadə etməyə çalışmasının növbəti əlamətidir. Qətnamə Nüvə Silahlarının Yayılmasının Qarşısının Alınması Müqaviləsinin (NPT) əsas prinsiplərini pozur və sülh məqsədli nüvə fəaliyyətinə dair ölkələrin hüquqlarını kobud şəkildə nəzərə almır.

Bəyanatda həmçinin ABŞ və Avropa ölkələrinin keçmişdə Ümumi Hərtərəfli Fəaliyyət Planını (JCPOA) sui-istifadə etməsi, İranın nüvə obyektlərinə hərbi hücumlar etməsi və BMT Təhlükəsizlik Şurasının keçmiş qətnamələrini yenidən canlandırmaq cəhdi tənqid olunub. Nazirlik vurğulayıb ki, İran IAEA ilə əməkdaşlıqda məsuliyyətli davranıb, sentyabrın 9-da razılaşma əsasında bəzi nüvə obyektlərinin yoxlanışını təmin edib, lakin Qərb ölkələrinin təzyiqi bu prosesi pozub.

İranın bəyanatında ABŞ və Avropa ölkələrinin Fələstin, Livan və regiondakı digər ölkələrdə İsrailin hərbi fəaliyyətinə dolayısı ilə dəstək verdiyi də qeyd olunub. Nazirlik, qətnaməni dəstəkləməyən ölkələrə təşəkkürünü bildirərək, İranın sülh məqsədli nüvə proqramı ilə bağlı hüquqlarını qorumaqda qətiyyətli olduğunu vurğulayıb.