BAKI, AzerVoice, Nailə Babazadə

BMT-nin Baş katibi Antonio Quterreş İsraillə HƏMAS arasında Qəzzada atəşkəs planının ilk mərhələsinin razılaşdırılmasını müsbət dəyərləndirib.

AzerVoice xəbər verir ki, BMT Baş katibinin sözçülüyü vasitəsilə yayılan yazılı açıqlamada Quterreş bildirib ki, ABŞ Prezidenti Donald Trampın təklifi əsasında əldə olunan razılaşma həm atəşkəsin təmin olunması, həm də girovların azad edilməsi baxımından mühüm addımdır.

"Prezident Donald Trampın təqdim etdiyi təklifə əsasən Qəzzada atəşkəsin əldə olunması və girovların azad olunması barədə razılaşmanın elan edilməsini məmnuniyyətlə qarşılayıram", – deyə Quterreş qeyd edib.

O, razılaşmanın əldə olunmasında rol oynayan ABŞ, Qətər, Misir və Türkiyənin diplomatik səylərini yüksək qiymətləndirərək, bütün tərəfləri razılaşmanın şərtlərinə tam əməl etməyə çağırıb.

Baş katib həmçinin qeyd edib ki, Qəzzada iztirabların sona çatması üçün bütün girovlar azad edilməli, daimi atəşkəsə nail olunmalı və bölgəyə humanitar yardımın dərhal çatdırılması təmin edilməlidir.

Quterreş beynəlxalq ictimaiyyəti yaranmış bu fürsətdən istifadə edərək uzunmüddətli sülhə nail olunması üçün konkret addımlar atmağa çağırıb.

"Bütün tərəfləri işğalın sona çatması, Fələstin xalqının öz müqəddəratını təyin etmə hüququnun tanınması və israillilər ilə fələstinlilərin sülh və təhlükəsizlik şəraitində yaşaya bilməsi üçün iki dövlətli həll yoluna aparacaq etibarlı siyasi prosesin qurulmasına dəvət edirəm", – deyə o vurğulayıb.