BAKI, AzerVoice, Nailə Babazadə

ABŞ Prezidenti Donald Trampın, Venesuela hökuməti ilə aparılan diplomatik əlaqələri dayandırmaq əmri verdiyi iddia edilib.

AzerVoice xəbər verir ki, bu barədə New York Times qəzeti məlumat verib.

Trampın Venesuela hökuməti ilə diplomatik təmasları həyata keçirən Riçard Qrenellə, Venesuela Prezidenti Nikolas Maduro ilə aparılan danışıqlar da daxil olmaqla, bütün əlaqələrin dayandırılması barədə göstəriş verdiyi bildirilib.

Xəbərdə qeyd olunub ki, Tramp, Maduronun ABŞ-ın “hakimiyyətdən könüllü şəkildə get” tələbinə cavab verməməsindən və Venesuelalı rəsmilərin “narkotik qaçaqmalçılığı ilə əlaqələrinin olmadığı” yönündəki iddialarından getdikcə daha çox məyus olub.

Rəsmilərin sözlərinə görə, Tramp administrasiyası gərginliyin artması ehtimalına qarşı Maduronu hakimiyyətdən uzaqlaşdırmağa yönəlik variantları da əhatə edən müxtəlif hərbi planlar hazırlayıb.

Tramp imzaladığı fərmanla, Cənubi Amerika mənşəli narkotik kartellərinə qarşı mübarizənin yerində aparılması məqsədilə ordunun daha geniş və effektiv istifadə olunması göstərişi verib. Müdafiə naziri Pit Hegset də ABŞ ordusunun Venesuelada rejim dəyişikliyi də daxil olmaqla əməliyyatlara hazır olduğunu bildirib.

ABŞ hökuməti, avqustun 8-də Venesuela Prezidenti Nikolas Maduronun tutulması və ya məhkum olunmasına dair məlumat verənlər üçün əvvəl 25 milyon dollar olan mükafatı 50 milyon dollara qaldırdığını da açıqlamışdı.

Digər tərəfdən, ABŞ-ın Venesuela sahillərində bəzi qayıqları “narkotik qaçaqmalçılığı” səbəbilə hədəfə alması həm Venesuela hökuməti, həm də beynəlxalq ictimaiyyət tərəfindən tənqid edilmiş, edilən hücumların “beynəlxalq hüquqa zidd olduğu” bildirilmişdi.