BAKI, AzerVoice, Nailə Babazadə
Birləşmiş Millətlər Təşkilatının (BMT) İnsan Haqları Şurasının 60-cı sessiyası BMT-nin Cenevrə Ofisində işə başlayıb.
AzerVoice xəbər verir ki, sessiyaya İsveçrənin BMT Cenevrə Ofisindəki Daimi Nümayəndəsi, səfir Yurq Lauberin rəhbərliyi ilə start verilib.
Açılışda çıxış edən BMT-nin İnsan Haqları üzrə Ali Komissarı Folker Türk İsrailin Qəzza zolağında törətdiyi hərəkətləri sərt şəkildə tənqid edib. O, İsrailin fələstinli mülki vətəndaşlara qarşı kütləvi qətliamlar həyata keçirdiyini, bu səbəbdən bölgədə təsvirolunmaz əzablar və genişmiqyaslı dağıntılar baş verdiyini bildirib.
Türkün sözlərinə görə, İsrailin həyati əhəmiyyətli yardımların Qəzzəyə çatdırılmasına əngəl törətməsi nəticəsində insanlar aclıqdan ölür, jurnalistlər hədəfə alınır və ard-arda müharibə cinayətləri törədilir “Yüksək vəzifəli israilli rəsmilərin açıq şəkildə soyqırım ritorikasından istifadə etməsi və fələstinlilərin insanlıqdan çıxarılması məni dəhşətə gətirir,” – deyə Ali Komissar qeyd edib.
Türk bölgənin sülh üçün fəryad etdiyini, Qəzzənin isə faktiki olaraq bir "məzar" halına gəldiyini bildirib. O, daha çox hərbiləşmənin, işğalın və ilhaqın yalnız zorakılığı, qisası və terroru artıracağı barədə xəbərdarlıq edib.
Ali Komissar BMT-nin Beynəlxalq Ədalət Məhkəsinin İsrailə qarşı çıxardığı qərarların yerinə yetirilməsinin vacibliyini vurğulayıb.
“İsrail soyqırımı əməllərinin qarşısını almağa, bu əməllərə təşviq edənləri cəzalandırmağa və Qəzzədəki fələstinlilərə yardımın təmin edilməsinə hüquqi cəhətdən məsuldur,” – deyə Türk bildirib.
Folker Türk bildirib ki, beynəlxalq ictimaiyyət Qəzzədə baş verənləri dayandırmaq üçün kifayət qədər səy göstərmir “Biz Qəzzə xalqını tək qoyuruq. Soyqırımın qarşısını almaq üçün qəti addımlar hanı? Dövlətlər niyə bu vəhşiliklərin qarşısını almaq üçün hərəkətə keçmir? Müharibə hüququnu pozma riski olan silahların İsrailə axını dayandırılmalıdır.” - deyə qeyd edib.
Türk dövlətləri Qəzzəyə humanitar yardımın çatdırılması, əsirlərin və əsassız saxlanılanların azad edilməsi üçün maksimum təzyiq göstərməyə çağırıb. O, həmçinin İsrailin Qəzzəni hərbi yolla nəzarətə alma və işğal altındakı İordan çayının qərb sahilini ilhaq etmə planlarına qarşı ciddi tədbirlər görülməli olduğunu qeyd edib.
Türk çıxışında ABŞ-ın BMT-nin Fələstin üzrə Xüsusi Məruzəçisi Franseska Albaneseyə qarşı tətbiq etdiyi sanksiyaları qınayıb və onların aradan qaldırılmalı olduğunu vurğulayıb. O, eyni zamanda ABŞ-ın Beynəlxalq Cinayət Məhkəməsinin hakim və prokurorlarına qarşı tətbiq etdiyi sanksiyaların da narahatlıq doğurduğunu bildirib.