BAKI, AzerVoice, Nərmin Ağayeva

Cambridge Dictionary bu il müasir həyat və internet mədəniyyətini əks etdirən 6000-dən çox yeni sözü lüğətə əlavə edəcək.

AzerVoice xəbər verir ki, Böyük Britaniyada yerləşən Cambridge Dictionary-nin açıqlamasına görə, yeni sözlər arasında sosial mediada populyarlaşan "skibidi" və "tradwife" kimi ifadələr də yer alacaq.

"Skibidi" sözü YouTube-da yayılan animasiya serialından qaynaqlanaraq bəzən “sərin”, bəzən də mənasız bir ifadə kimi işlədilir. "Tradwife" isə ənənəvi evdar qadın həyat tərzini təsvir etmək üçün istifadə olunur. Həmçinin, lüğətə “bro” və “oliqarxiya” sözlərindən əmələ gələn “broliqarxiya” da əlavə edilib. Bu termin son dərəcə varlı və güclü kişilərdən ibarət kiçik bir qrup, xüsusən də texnologiya sektorunda olanları təsvir etmək üçün istifadə olunur.

Qeyd edək ki, pandemiyadan sonra formalaşan yeni iş mədəniyyətini əks etdirən terminlər, məsələn, "mouse jiggler" - kompüteri işləməyən zaman aktiv göstərən cihaz və ya proqram təminatı, iş yerində etibarlı münasibəti təsvir edən "work wife" yaxud "work spouse" kimi ifadələr də əlavə edilənlər sırasındadır. Lüğət proqramının direktoru Kolin Makintoşun sözlərinə görə, yalnız geniş işlənmə ehtimalı olan sözlər rəsmi olaraq daxil edilir.