BAKI, AzerVoice
Kanadanın Alberta əyalətində əsrlərdir elmi mübahisələrin mövzusu olan nadir bir atmosfer hadisəsi – “ildırım topu” müşahidə olunub. Hadisə şahidləri tərəfindən qeydə alınan görüntülər alimlər üçün mühüm araşdırma materialına çevrilib.
AzerVoice xəbər verir ki, Ed və Melinda Pardy adlı yerli sakinlər evlərinin yaxınlığında ildırım fırtınasını izləyərkən, yer səviyyəsindən bir neçə metr yüksəklikdə asılı vəziyyətdə parlaq mavi rəngli işıq topunun peyda olduğunu görüblər.
Onların sözlərinə görə, obyekt təxminən bir dəqiqə havada qalıb və sonra sönərək yoxa çıxıb.
Müşahidə edilən bu hadisə elm aləmində “kürə ildırımı” və ya “ildırım topu” kimi tanınır. Son illərdə alimlər laboratoriya şəraitində plazma kürələri yaratmağa çalışsalar da, real müşahidələrin azlığı səbəbindən təbiətdə baş verən proseslərin detalları hələ də naməlum qalır.
2014-cü ildə Çinli tədqiqatçılar ilk dəfə olaraq bu hadisənin görüntülərini təsadüfən qeydə alaraq, fenomenin torpağın ildırım nəticəsində buxarlanıb parıldaması ilə əlaqəli ola biləcəyini irəli sürmüşdülər. Lakin bəzi mütəxəssislər bu yanaşma ilə razılaşmayaraq, hadisəni yüksək təzyiqli hava kapsulunda sıxışan işığın nəticəsi kimi izah edirlər.
Alberta bölgəsində qeydə alınan son görüntülərlə bağlı hələlik heç bir elmi təsdiq verilməsə də, Pardy ailəsi açıqlamasında bir sıra tədqiqatçıların artıq onlarla əlaqə saxladığını bildirib. Onlar obyektin təxminən bir-iki metr diametrində olduğunu və tamamilə parlaq işıqdan ibarət göründüyünü qeyd ediblər.
Hazırda görüntülər müvafiq elmi qurumlar tərəfindən analiz edilir və gələcək araşdırmalar üçün əhəmiyyətli mənbə hesab olunur.
