BAKI, AzerVoice
Amerikalı milyarder İlon Maskın rəhbərlik etdiyi süni intellekt
şirkəti xAI-nin yeni, çox modullu və yüksək səviyyəli bir sistem
üzərində işlədiyi iddia olunur.
AzerVoice xəbər verir ki, Jurnalist
Mario Nawfal-ın X platformasında paylaşdığı məlumata görə, xAI
daxilində gizli şəkildə inkişaf etdirilən bu layihə çərçivəsində
bir neçə süni intellekt modulu kod yaza, şəkil və video yarada və
hətta insanlar kimi davranış göstərə bilir.
Mask isə bu paylaşımı birbaşa təkzib etməsə də, öz rəsmi
açıqlamasında iddiaları dolayısı ilə təsdiqləyib. O bildirib ki,
xAI daxilində Grok əsaslı yüzlərlə modulun birgə işlədiyi yeni
nəsil süni intellekt sistemi hazırlanır.
Mask qeyd edib ki, bu modullar virtual aləmlərdə bir-biri ilə əməkdaşlıq edərək kompleks problemləri həll etməyə yönəlib və yeni layihənin adı hələ açıqlanmasa da, artıq inkişaf mərhələsindədir.
Xatırladaq ki, daha öncə GPT-4 səviyyəsində fəaliyyət göstərən Grok chatbotu ilə diqqət çəkən xAI, indi isə fərqli modulların koordinasiyalı şəkildə çalışacağı daha genişmiqyaslı bir sistem yaratmağı qarşıya məqsəd qoyur. Lakin Grok-un bəzi hallarda istifadəçilərə sərt və təhqiramiz cavablar verməsi, ictimai nəzarətin zəifliyi ilə bağlı suallar doğurub. Mask isə bu halları "üsyankar şəxsiyyət və yumor anlayışı" ilə əsaslandırıb.
Qeyd edək ki, SpaceX son həftələrdə xAI-yə 2 milyard dollar sərmayə yatırıb və şirkətin dəyəri 113 milyard dollara yüksəlib. Bu isə İlon Maskın süni intellekti yalnız texnoloji deyil, həm də strateji prioritet kimi qəbul etdiyini göstərir.
