BAKI, AzerVoice, Nailə Babazadə

ABŞ-ın Dövlət katibi Marko Rubio Qəzzada əldə olunan atəşkəsin detalları və icrası ilə bağlı müzakirələr aparmaq üçün İsrailə səfər edəcək. İsrail mediasında yayılan xəbərlərə görə, Rubio iki günlük səfəri çərçivəsində sabah İsrailə çatacaq.

AzerVoice xəbər verir ki, məlumata görə, səfərin əsas gündəm mövzusunu Qəzzada razılaşdırılan atəşkəsin tətbiqi təşkil edir.

Rubionun səfəri ABŞ-ın bölgədəki diplomatik səylərinin davamı kimi qiymətləndirilir. Qeyd edilir ki, bundan öncə ABŞ vitse-prezidenti Cey Di Vans, Prezident Donald Trampın Yaxın Şərq üzrə xüsusi nümayəndəsi Stiv Vitkoff və Trampın kürəkəni Cared Kuşner də bu həftə Qəzzada atəşkəsin davamlılığını təmin etmək məqsədilə İsrailə səfər etmişdilər.

Xatırladaq ki, İsrailin bazar günü Qəzzaya qarşı həyata keçirdiyi genişmiqyaslı hava hücumları 10 oktyabrda əldə olunmuş atəşkəsin pozulacağı ilə bağlı ciddi narahatlıqlar yaratmışdı. Hücumlarla yanaşı, İsrail hakimiyyəti Qəzzaya humanitar yardım tırlarının girişini də dayandırmışdı.

Lakin qısa müddət sonra İsrail Baş naziri Benyamin Netanyahu-nun hökuməti geri addım ataraq hücumların dayandırıldığını və atəşkəs rejiminin yenidən qüvvəyə mindiyini elan edib. Eyni zamanda, Qəzzaya humanitar yardımların girişinə icazə veriləcəyi bildirilib.