BAKI, AzerVoice
Qəzzada atəşkəs danışıqları iflas ərəfəsində – tərəflər qarşılıqlı ittihamlarla çıxış edir.
AzerVoice xəbər verir ki, Fələstin rəsmilərinin BBC-yə verdiyi məlumata görə, Qətərin paytaxtı Dohada keçirilən atəşkəs və məhbus mübadiləsi üzrə danışıqlar “iflas ərəfəsindədir”.
Fələstin tərəfi bildirib ki, İsrail hökuməti danışıqları qəsdən ləngidir. Onların sözlərinə görə, İsrail Baş naziri Benyamin Netanyahu ABŞ prezidenti Donald Trampla görüşmək məqsədilə Vaşinqtona səfər edərək vaxt qazanmağa çalışır. Eyni zamanda, danışıqların həlledici mərhələsində qərar vermə səlahiyyəti olmayan nümayəndə heyəti Dohaya göndərilib.
Mənbələr danışıqlarda iki əsas məsələ – Qəzzaya humanitar yardımın çatdırılması mexanizmi və İsrailin mərhələli geri çəkilmə planının müzakirə edildiyini bildiriblər. Fələstin tərəfi, xüsusilə Həmas, geri çəkilmə planını kompromis üçün başlanğıc nöqtəsi kimi qəbul etdiklərini qeyd edib.
BBC-yə danışan yüksək rütbəli Fələstinli müzakirəçi deyib: “İsraillilər bu danışıqlarda heç vaxt ciddi olmayıb. Onlar sadəcə vaxt qazanmaq və yalançı irəliləyiş təəssüratı yaratmaq niyyətindədirlər.”
Qeyd edək ki, İsrail və Həmas arasında vasitəçilik edən əsas aktorlar – Qətər, ABŞ və Misir – indiyədək bir neçə raund danışıqlara ev sahibliyi etsə də, razılaşmaya nail olunmayıb. Mövcud gərginlik fonunda danışıqların taleyi qeyri-müəyyən olaraq qalır.
