BAKI, AzerVoice

Instagram və WhatsApp süni intellekti istifadəçilərlə söhbətə başlayacaq – Meta yeni funksiyasını sınaqdan keçirir.

AzerVoice xəbər verir ki, Meta şirkəti Instagram, WhatsApp və Messenger platformalarında AI (süni intellekt) chatbotlarının istifadəçilərə ilk mesajı yazaraq söhbətə başlamasına imkan verən yeni xüsusiyyət üzərində işləyir.

Məqsəd, istifadəçi əlaqəsini artırmaq və platformada interaktivliyi gücləndirməkdir.

Business Insider-in məlumatına görə, “Meta AI” adlanan süni intellekt sistemi keçmiş söhbətləri təhlil edərək istifadəçiyə mesajlar göndərir. Məsələn, “Bu gecə üçün film tövsiyəsi istərdinizmi?” kimi mesajlarla istifadəçiyə müraciət edə bilir.

Yeni funksiyanın tətbiqi yalnız son 14 gün ərzində chatbotla azı bir dəfə ünsiyyətdə olan və beşdən çox mesaj yazmış istifadəçilər üçün mümkündür. Əgər istifadəçi ilk mesaja cavab verməzsə, sistem ikinci mesaj göndərməyəcək.

Meta-nın təsdiqinə görə, bu funksiya hazırda məhdud test mərhələsindədir və Meta AI Studio vasitəsilə fərdiləşdirilə bilən chatbotların gələcəkdə istifadəçilərlə daha proaktiv şəkildə əlaqəyə girməsi də mümkündür.

Qeyd edək ki, yeni funksiyanın məxfilik və məlumat təhlükəsizliyi baxımından riskləri də müzakirə mövzusudur. Süni intellekt tərəfindən gözlənilməz mesajların gəlməsi bəzi istifadəçiləri narahat edə bilər və bu, sosial mediada AI münasibətlərinin sərhədləri ilə bağlı suallar doğurur.