BAKI, AzerVoice

Şüşə butulkalarda mikroplastik miqdarı düşündüyümüzdən daha çox ola bilər.

AzerVoice xəbər verir ki, Fransanın Qida Təhlükəsizliyi Agentliyinin (ANSES) yeni araşdırmasına görə, şüşə butulkalarda satılan içkilərdə mikroplastik miqdarı plastik və metal qutularda olanlardan qat-qat yüksəkdir.

Journal of Food Composition and Analysis jurnalında dərc edilən araşdırmada göstərilir ki, şüşə butulkalarda litrə orta hesabla 100 mikroplastik hissəcik düşür. Bu isə digər qablaşdırmalardan 5-50 dəfə çoxdur. Mütəxəssislər bildirirlər ki, mikroplastiklərin əsas mənbəyi butulkanın özü deyil, onun qapaqlarındakı boya və plastik qatdır. Daşınma və saxlanma zamanı bu hissəciklər maye ilə qarışaraq çirklənməyə səbəb olur.

Alimlər bildirirlər ki, mikroplastiklər insan bədəninə hava, su və qida vasitəsilə daxil ola bilər və onların insult, hormonal pozğunluqlar, hətta bəzi xərçəng növləri ilə əlaqəsi ola bilər. Lakin bu araşdırma birbaşa sağlamlıq təsirini sübut etməsə də, şüşə butulkaların zərərsiz olduğuna dair fikirə ciddi sual işarəsi qoyur.

Mütəxəssislər istehsalçılara təklif edirlər ki, butulka qapaqları istifadədən əvvəl üfləmə və ya su-spirt məhlulu ilə təmizlənsin. Bu yolla mikroplastik çirklənməsi üçdə birə qədər azaldıla bilər.

Qeyd edək ki, bu tapıntılar şüşə qablaşdırmaların “ən təmiz” alternativ olduğuna dair ictimai qənaətin yenidən nəzərdən keçirilməsinə səbəb ola bilər.